પેરિસ:  વિશ્વ જ્યારે ઈરાન અને અમેરિકા વચ્ચેના સંઘર્ષની ચિંતામાં ડૂબેલું છે, ત્યારે ફ્રાન્સના રાષ્ટ્રપતિ ઇમેન્યુઅલ મેક્રોને એક સનસનાટીભર્યા નિર્ણયથી દુનિયાને ચોંકાવી દીધી છે. મેક્રોને સ્પષ્ટ કર્યું છે કે ફ્રાન્સ હવે પોતાના પરમાણુ શસ્ત્રોની સંખ્યામાં ધરખમ વધારો કરશે. મહત્વની વાત એ છે કે, ફ્રાન્સ તેની પરમાણુ ક્ષમતા તો વધારશે પણ દુનિયાને તે જણાવશે નહીં કે તેની પાસે કેટલા બોમ્બ છે. ૨૮ વર્ષના લાંબા વિરામ બાદ ફ્રાન્સનું આ પગલું સૂચવે છે કે યુરોપ હવે સુરક્ષા માટે માત્ર અમેરિકા પર નિર્ભર રહેવા માંગતું નથી. ઈરાનમાં આવેલા ૪.૩ ની તીવ્રતાના ભૂકંપને ઘણા લોકો ગુપ્ત પરમાણુ પરીક્ષણ માની રહ્યા છે, ત્યારે ફ્રાન્સની આ જાહેરાતે વૈશ્વિક રાજનીતિમાં ગરમાવો લાવી દીધો છે.

મેક્રોને માત્ર શસ્ત્રો વધારવાની જ વાત નથી કરી, પરંતુ યુરોપિયન સાથી દેશો માટે એક મોટું 'સુરક્ષા કવચ' પણ જાહેર કર્યું છે. નવી પરમાણુ નીતિ હેઠળ, ફ્રાન્સ તેના પરમાણુ શસ્ત્રોથી સજ્જ વિમાનોને જર્મની, પોલેન્ડ અને સ્વીડન જેવા સાથી દેશોમાં અસ્થાયી રૂપે તૈનાત કરવાની મંજૂરી આપશે. જોકે, મેક્રોને ખૂબ જ ચતુરાઈથી સ્પષ્ટ કર્યું છે કે પરમાણુ બોમ્બનો ઉપયોગ ક્યારે અને કેવી રીતે કરવો, તેનો અંતિમ નિર્ણય (Trigger) માત્ર ફ્રાન્સના હાથમાં જ રહેશે. આ નિર્ણય દ્વારા ફ્રાન્સ યુરોપના અઘોષિત 'ન્યુક્લિયર લીડર' તરીકે ઉભરી રહ્યું છે, જેનાથી બ્રિટન અને જર્મની જેવા દેશો સાથેના તેના સંબંધોમાં નવો વળાંક આવશે.

હાલમાં ફ્રાન્સ પાસે આશરે ૩૦૦ જેટલા પરમાણુ શસ્ત્રો હોવાનું મનાય છે, પરંતુ બદલાતી ભૌગોલિક પરિસ્થિતિમાં આ સંખ્યા ઓછી જણાઈ રહી છે. મેક્રોને બ્રિટન, નેધરલેન્ડ અને બેલ્જિયમ જેવા ૮ દેશો સાથે વાટાઘાટો શરૂ કરી દીધી છે જેથી યુરોપની સ્વતંત્રતા જળવાઈ રહે. ઈરાન અને રશિયાના વધતા જોખમ વચ્ચે, ફ્રાન્સની આ નવી વ્યૂહરચના વિશ્વને ફરી એકવાર શીત યુદ્ધ  જેવી પરિસ્થિતિ તરફ ધકેલી રહી હોય તેમ લાગે છે. હવે જોવાનું એ રહેશે કે ફ્રાન્સના આ આક્રમક વલણ પર રશિયા અને અમેરિકાની શું પ્રતિક્રિયા આવે છે.