ભુવનેશ્વર : ઓડિશામાં ભગવાન જગન્નાથના દર્શને જતા લાખો શ્રદ્ધાળુઓ અને સ્થાનિક રહેવાસીઓ માટે કેન્દ્ર સરકાર તરફથી મોટી ભેટ મળી છે. કેન્દ્રીય માર્ગ પરિવહન મંત્રી નિતિન ગડકરીના નેતૃત્વ હેઠળ નેશનલ હાઈવે ઓથોરિટી ઓફ ઈન્ડિયા (NHAI) એ મહત્વાકાંક્ષી 'કેપિટલ રિજન રિંગ રોડ' એટલે કે ભુવનેશ્વર બાયપાસ પ્રોજેક્ટ માટે કોન્ટ્રાક્ટ સોંપી દીધા છે. આ પ્રોજેક્ટ પૂર્ણ થતાની સાથે જ પુરી અને ભુવનેશ્વર વચ્ચેના ટ્રાફિકની સમસ્યાનો કાયમી ઉકેલ આવી જશે.
ત્રણ પેકેજમાં તૈયાર થશે 111 કિમીનો હાઈવે
આ 111 કિમી લાંબો, સિક્સ લેન એક્સેસ-કંટ્રોલ્ડ ગ્રીનફિલ્ડ રિંગ રોડ રામેશ્વરથી ટાંગી સુધી બનાવવામાં આવશે. પ્રોજેક્ટને ઝડપથી પૂર્ણ કરવા માટે તેને ત્રણ મુખ્ય પેકેજમાં વહેંચવામાં આવ્યો છે:
1.    પેકેજ-1: રામેશ્વરથી બીલીપાડા (40 કિમી) - પટેલ ઇન્ફ્રાસ્ટ્રક્ચર દ્વારા નિર્માણ.
2.    પેકેજ-2: બીલીપાડાથી ગોવિંદપુર (30 કિમી) - VRC કન્સ્ટ્રક્શન દ્વારા નિર્માણ.
3.    પેકેજ-3: ગોવિંદપુરથી ટાંગી (41 કિમી) - HG ઇન્ફ્રા એન્જિનિયરિંગ દ્વારા નિર્માણ.
100 કિમીની સ્પીડ અને આધુનિક સુવિધાઓ
આ હાઈવેની ખાસિયત એ છે કે તેને 100 કિમી પ્રતિ કલાકની ડિઝાઈન સ્પીડ સાથે તૈયાર કરવામાં આવી રહ્યો છે. પ્રોજેક્ટમાં અનેક ઇન્ટરચેન્જ, ફ્લાયઓવર, રેલ્વે ઓવરબ્રિજ અને અંડરપાસનો સમાવેશ થાય છે, જેથી ક્યાંય પણ સિગ્નલ કે ટ્રાફિકમાં અટકવું ન પડે. માર્ગની બંને બાજુ સર્વિસ રોડ પણ બનાવવામાં આવશે જેથી સ્થાનિક વાહનોને અવરજવરમાં સરળતા રહે.
ભક્તો અને અર્થતંત્રને શું ફાયદો?
ભુવનેશ્વર, કટક અને ખોરધા જેવા મુખ્ય શહેરોમાં હાલમાં ભારે ટ્રાફિક જામની સમસ્યા રહે છે. આ રિંગ રોડ બનવાથી મુસાફરીનો સમય અડધો થઈ જશે. ખાસ કરીને રથયાત્રા અને અન્ય તહેવારો દરમિયાન પુરી જતા ભક્તોને ભુવનેશ્વર શહેરના ગીચ ટ્રાફિકમાંથી પસાર થવું પડશે નહીં. આ ઉપરાંત, આ પ્રોજેક્ટથી હજારો નવી નોકરીઓનું સર્જન થશે અને લોજિસ્ટિક્સ ખર્ચ ઘટવાથી ઓડિશાના આર્થિક વિકાસને વેગ મળશે.
30 મહિનામાં કામ પૂર્ણ કરવાનો લક્ષ્યાંક
સરકારે આ ભવ્ય પ્રોજેક્ટને આગામી 30 મહિનામાં એટલે કે અઢી વર્ષમાં પૂર્ણ કરવાનો લક્ષ્યાંક રાખ્યો છે. આ પ્રોજેક્ટ પૂર્વી ભારતના ઇન્ફ્રાસ્ટ્રક્ચર માટે ગેમ-ચેન્જર સાબિત થશે, જે પ્રવાસનને પ્રોત્સાહન આપવાની સાથે પર્યાવરણને અનુકૂળ મુસાફરીની સુવિધા પણ પૂરી પાડશે.