મુંબઈ: મધ્ય પૂર્વમાં ચાલી રહેલા ભીષણ જંગ અને અમેરિકાના 'ઓપરેશન એપિક ફ્યુરી'ની સીધી અસર આજે ભારતીય બુલિયન માર્કેટ પર જોવા મળી છે. ગઈકાલ સુધી આસમાને પહોંચેલા સોના-ચાંદીના ભાવમાં આજે જોરદાર ઘટાડો નોંધાયો છે. ખાસ કરીને ચાંદીમાં વેચવાલીનું એવું તોફાન આવ્યું કે બજાર ખૂલતાની સાથે જ ૬% ની લોઅર સર્કિટ લાગી ગઈ અને ભાવમાં સીધો ₹૧૬,૭૦૦ થી વધુનો ઘટાડો જોવા મળ્યો.
૩ માર્ચની સાંજ રોકાણકારો માટે કપરી સાબિત થઈ છે. એમસીએક્સ (MCX) પર ચાંદીનો ભાવ જે ગઈકાલે ₹૨,૭૮,૪૮૧ પર બંધ થયો હતો, તે આજે તૂટીને ₹૨,૬૧,૭૭૩ પર આવી ગયો છે. ઐતિહાસિક અસ્થિરતાને કારણે એક્સચેન્જે ટ્રેડિંગ અટકાવવા માટે સર્કિટ બ્રેકરનો ઉપયોગ કરવો પડ્યો હતો. એક જ દિવસમાં ચાંદીમાં થયેલો આટલો મોટો ઘટાડો બજારમાં ગભરાટની સ્થિતિ સ્પષ્ટ કરે છે.
 માત્ર ચાંદી જ નહીં, પણ રોકાણકારો માટે સુરક્ષિત ગણાતું સોનું પણ આજે ધોવાયું છે. ૨ એપ્રિલની એક્સપાયરી વાળું સોનું ગઈકાલના બંધ ભાવ ₹૧,૬૬,૦૭૪ થી સીધું ₹૫,૦૨૪ ઘટીને ₹૧,૬૧,૦૫૦ ના સ્તરે પહોંચી ગયું છે. દિવસ દરમિયાન સોનામાં ₹૩,૩૫૦ થી વધુની વધઘટ જોવા મળી હતી, જેના કારણે નાના રોકાણકારો મૂંઝવણમાં મુકાયા છે.
કેમ આવ્યું કિંમતોમાં આટલું મોટું તોફાન?: નિષ્ણાતોના મતે આ ઘટાડા પાછળ મુખ્ય ત્રણ કારણો જવાબદાર છે:
૧. પ્રોફિટ બુકિંગ: યુદ્ધના સમાચાર વચ્ચે ગઈકાલે ભાવ જે રીતે વધ્યા હતા, તેને જોતા રોકાણકારોએ આજે ઉંચા ભાવે નફો વસૂલવાનું શરૂ કર્યું.
૨. માર્જિન પ્રેશર: બજારમાં ભારે અસ્થિરતાને લીધે વેપારીઓએ તેમની પોઝિશન સ્ક્વેર ઓફ કરવી પડી હતી.
૩. યુદ્ધની અનિશ્ચિતતા: 'ઓપરેશન એપિક ફ્યુરી' બાદ રોકાણકારો હવે રોકડ બચાવવા તરફ વળ્યા છે, જેની અસર કિંમતી ધાતુઓ પર પડી છે.
 બજારના જાણકારો માને છે કે અત્યારે બજાર અત્યંત અસ્થિર છે. ૩ માર્ચ બુલિયન માર્કેટ માટે 'કાળો દિવસ' સાબિત થયો છે. આવી સ્થિતિમાં ઉતાવળે ખરીદી કે વેચાણ કરવાને બદલે 'રાહ જુઓ અને જુઓ' ની નીતિ અપનાવવી હિતાવહ છે