નવી દિલ્હી/દુબઈ: પશ્ચિમ એશિયામાં યુદ્ધની જ્વાળાઓ વધુ પ્રચંડ બનતા વૈશ્વિક હવાઈ સેવાઓ ખોરવાઈ ગઈ છે, ત્યારે ખાડી દેશોમાં ફસાયેલા સેંકડો ભારતીયોને સુરક્ષિત રીતે સ્વદેશ લાવવા માટે 'રેસ્ક્યુ ઓપરેશન' યુદ્ધના ધોરણે શરૂ કરવામાં આવ્યું છે. ખાનગી વિમાનન કંપની સ્પાઈસ જેટે આજે 4 માર્ચના રોજ સંયુક્ત આરબ અમીરાત (UAE) થી 8 વિશેષ ફ્લાઈટ્સ ચલાવવાની સત્તાવાર જાહેરાત કરી છે. અમેરિકા અને ઈરાન વચ્ચેના સીધા સૈન્ય સંઘર્ષને પગલે એરસ્પેસ બંધ હોવા છતાં, ભારતીય નાગરિકોને વતન પહોંચાડવા માટે ફુજૈરાહ એરપોર્ટને મુખ્ય કેન્દ્ર બનાવવામાં આવ્યું છે. આ વિશેષ સેવા હેઠળ દિલ્હી માટે 4, મુંબઈ માટે 4 અને કોચ્ચિ માટે 1 ફ્લાઈટનું સંચાલન કરીને સેંકડો ભારતીયોને મોતના મુખમાંથી બહાર કાઢવામાં આવશે.

યુદ્ધના મેદાનમાં ફસાયેલા ભારતીયો માટે સ્થિતિ પલ પલ ગંભીર બની રહી છે. સ્પાઈસ જેટ દ્વારા 3 માર્ચથી જ આ રેસ્ક્યુ કામગીરી શરૂ કરી દેવામાં આવી હતી, પરંતુ મુસાફરોનો ધસારો જોતા હવે ફુજૈરાહથી દિલ્હી અને મુંબઈ માટેની નિર્ધારિત ફ્લાઈટ્સ પણ ફરીથી સક્રિય કરી દેવામાં આવી છે. એરલાઈન્સના સૂત્રોના જણાવ્યા અનુસાર, યુદ્ધગ્રસ્ત વિસ્તારોની આસપાસથી પસાર થતી આ ફ્લાઈટ્સ માટે વિશેષ સુરક્ષા પ્રોટોકોલનું પાલન કરવામાં આવી રહ્યું છે. ભારતીય વિદેશ મંત્રાલય આ સમગ્ર કામગીરી પર બાજ નજર રાખી રહ્યું છે જેથી કોઈ પણ નિર્દોષ નાગરિક આંતરરાષ્ટ્રીય સંઘર્ષનો ભોગ ન બને.

બીજી તરફ, કુવૈતથી ચિંતાજનક અહેવાલો પ્રાપ્ત થઈ રહ્યા છે જ્યાં અંદાજે 300 જેટલા ભારતીયો એક હોટલમાં કેદી જેવી હાલતમાં ફસાયા છે. કુવૈતની હોટલ ક્રાઉન પ્લાઝામાં રોકાયેલા આ મુસાફરોમાં મોટાભાગના મહારાષ્ટ્રના રહેવાસી છે. ત્યાં ફસાયેલા કલ્પેશ સંજય રાઠીએ વીડિયો સંદેશ દ્વારા પોતાની વ્યથા ઠાલવતા જણાવ્યું છે કે હોટલ મેનેજમેન્ટ અને સ્થાનિક સત્તાવાળાઓ તેમને કોઈ પણ પ્રકારનો સહયોગ આપી રહ્યા નથી. ટ્રાન્ઝિટ વિઝા પર આવેલા આ પ્રવાસીઓ પાસે હવે નાણાં અને સંસાધનોની પણ અછત વર્તાઈ રહી છે. આ પરિસ્થિતિને જોતા કુવૈત સ્થિત ભારતીય દૂતાવાસને તાત્કાલિક હસ્તક્ષેપ કરવા અપીલ કરવામાં આવી છે.

ભારત સરકાર માટે અત્યારે સૌથી મોટો પડકાર ખાડી દેશોમાં વસતા લાખો ભારતીયોની સુરક્ષા સુનિશ્ચિત કરવાનો છે. વડાપ્રધાન કાર્યાલય (PMO) સીધી રીતે આ સ્થિતિનું મોનિટરિંગ કરી રહ્યું છે અને જરૂર પડ્યે વાયુસેનાના વિમાનોને પણ સ્ટેન્ડબાય રાખવામાં આવ્યા છે. કુવૈત અને UAE માં ફસાયેલા લોકોના પરિવારોમાં ભારે ચિંતા જોવા મળી રહી છે. વિદેશ મંત્રાલયે સ્પષ્ટ કર્યું છે કે દરેક ભારતીય નાગરિકને સુરક્ષિત લાવવા માટે સરકાર કટિબદ્ધ છે અને આગામી 48 કલાકમાં વધુ વિશેષ ફ્લાઈટ્સની વ્યવસ્થા કરવામાં આવી શકે છે.