દુબઈ/દોહા: મધ્ય પૂર્વમાં અમેરિકા-ઈઝરાયેલ અને ઈરાન વચ્ચેના જંગની જ્વાળાઓ હવે ખાડી દેશોની સુરક્ષા દિવાલ સુધી પહોંચી છે. યુએસ સ્થિત પ્રતિષ્ઠિત ન્યૂઝ એજન્સી બ્લૂમબર્ગના એક વિસ્ફોટક અહેવાલે અત્યારે આંતરરાષ્ટ્રીય સ્તરે ખળભળાટ મચાવ્યો છે. બ્લૂમબર્ગે દાવો કર્યો છે કે સંયુક્ત આરબ અમીરાત (UAE) અને કતાર જેવા સમૃદ્ધ દેશોના હવાઈ સંરક્ષણ મિસાઈલ ભંડારમાં ખતરનાક સ્તરે ઘટાડો થયો છે. રિપોર્ટમાં એવું પણ જણાવાયું છે કે ઈરાન જે તીવ્રતાથી ડ્રોન અને મિસાઈલ હુમલા કરી રહ્યું છે તેના કારણે આ દેશોની ઈન્ટરસેપ્ટર મિસાઈલો ઝડપથી વપરાઈ રહી છે. જો કે, UAE અને કતાર બંને દેશોએ આ અહેવાલ પર આકરી પ્રતિક્રિયા આપી તેને પાયાવિહોણો અને સૈન્ય મનોબળ તોડવાનો પ્રયાસ ગણાવ્યો છે.

ઈરાન દ્વારા ખાડી દેશોમાં આવેલા અમેરિકન સૈન્ય મથકોને સતત નિશાન બનાવવામાં આવી રહ્યા છે, જેના કારણે સાઉદી અરેબિયા, UAE અને કતારની એર ડિફેન્સ સિસ્ટમ્સ ચોવીસ કલાક કાર્યરત છે. બ્લૂમબર્ગના અહેવાલે એવો ગંભીર દાવો કર્યો છે કે મિસાઈલોનો સ્ટોક ખૂટવા આવતા આ દેશો ખાનગી રીતે અમેરિકા પર દબાણ લાવી રહ્યા છે કે રાષ્ટ્રપતિ ડોનાલ્ડ ટ્રમ્પ ઈરાન સામેની લશ્કરી કાર્યવાહીને મર્યાદિત કરે. આ દાવાએ પશ્ચિમ એશિયામાં સૈન્ય સંતુલન ખોરવાઈ રહ્યું હોવાના સંકેત આપ્યા છે, પરંતુ UAE ના વિદેશ મંત્રાલયે તુરંત જ સ્પષ્ટતા કરી છે કે આ અહેવાલ દેશની વાસ્તવિક ઓપરેશનલ ક્ષમતાને પ્રતિબિંબિત કરતો નથી અને તેમની પાસે બહુ-સ્તરીય અત્યાધુનિક સંરક્ષણ પ્રણાલીનો મોટો કાફલો છે.

UAE સરકારના સત્તાવાર નિવેદન અનુસાર, દેશ પાસે માત્ર ટૂંકા કે મધ્યમ જ નહીં પરંતુ લાંબા અંતરના હવાઈ જોખમોને તોડી પાડવા માટે પર્યાપ્ત માત્રામાં દારૂગોળો ઉપલબ્ધ છે. મંત્રાલયે ભારપૂર્વક જણાવ્યું છે કે UAE ની રાષ્ટ્રીય સુરક્ષા વ્યવસ્થા અત્યંત મજબૂત છે અને કોઈ પણ પ્રકારના આકસ્મિક સંકટને લાંબા સમય સુધી ખાળવા માટે તેઓ સક્ષમ છે. બીજી તરફ, કતારના આંતરરાષ્ટ્રીય મીડિયા કાર્યાલયે પણ બ્લૂમબર્ગના દાવાને રદિયો આપતા કહ્યું છે કે તેમની પેટ્રિઅટ ઈન્ટરસેપ્ટર મિસાઈલોનો જથ્થો ખાલી થયો હોવાની વાત તદ્દન ખોટી છે. કતારે સ્પષ્ટ કર્યું છે કે તેમની સેના બાહ્ય આક્રમણ સામે દેશનું રક્ષણ કરવા માટે સંપૂર્ણ રીતે સજ્જ છે અને સંસાધનોની કોઈ અછત નથી.

વૈશ્વિક બજાર અને તેલના ભાવ પર અસર કરી રહેલા આ યુદ્ધમાં માહિતીનું યુદ્ધ (Information War) પણ તેજ બન્યું છે. વિશ્લેષકો માને છે કે આવા અહેવાલો પાછળનો હેતુ ખાડી દેશોમાં અસ્થિરતાનો માહોલ ઉભો કરવાનો હોઈ શકે છે. ભારત માટે પણ આ સમાચાર ચિંતાજનક છે કારણ કે પશ્ચિમ એશિયાની સુરક્ષા ભારતની ઉર્જા સુરક્ષા સાથે સીધી રીતે જોડાયેલી છે. હાલમાં UAE અને કતારના મક્કમ ઈનકાર બાદ હવે વિશ્વની નજર અમેરિકાના આગામી પગલાં પર છે કે શું તેઓ આ દેશોને વધારાની મિસાઈલો પૂરી પાડશે કે પછી સંઘર્ષ ઘટાડવા માટે રાજદ્વારી માર્ગ અપનાવશે. હાલમાં તો ખાડી દેશોએ પોતાની સંરક્ષણ દિવાલ મજબૂત હોવાનો હુંકાર કર્યો છે.