ટોંક: રાજસ્થાનના ઐતિહાસિક ટોંક શહેરમાં મંગળવારે મોડી રાત્રે જૂની દુશ્મનાવટની આગ ફરી ભભૂકી ઉઠતા બે સમુદાયો વચ્ચે હિંસક અથડામણના દ્રશ્યો સર્જાયા હતા. ઓલ્ડ ટોંક પોલીસ સ્ટેશન હેઠળના સંઘપુરા વિસ્તારમાં નજીવી બાબતે શરૂ થયેલો વિવાદ જોતજોતામાં ઉગ્ર પથ્થરમારામાં ફેરવાઈ ગયો હતો. બંને પક્ષોના ટોળાઓ સામસામે આવી જતાં સમગ્ર વિસ્તારમાં અફરાતફરી મચી ગઈ હતી અને ભયનું વાતાવરણ પ્રસરી ગયું હતું. આ હિંસક ઘટનામાં એક પક્ષના બે વ્યક્તિઓ ગંભીર રીતે ઘાયલ થતા તેમને તાત્કાલિક જિલ્લા હોસ્પિટલમાં ખસેડવામાં આવ્યા છે. હોસ્પિટલ પરિસરમાં પણ બંને પક્ષના સમર્થકો ઉમટી પડતા તણાવ ચરમસીમાએ પહોંચ્યો હતો, જેને પગલે વહીવટીતંત્રે તાબડતોબ વધારાની પોલીસ ફોર્સ ઉતારવાની ફરજ પડી હતી.

પરિસ્થિતિની ગંભીરતાને પારખીને જિલ્લા પોલીસ વડાના આદેશથી સિટી કોતવાલી, સદર અને ઓલ્ડ ટોંક પોલીસ સ્ટેશનની ટીમો સહિત પોલીસ લાઇનના જવાનોએ સંઘપુરામાં મોરચો સંભાળી લીધો હતો. આ ઉપરાંત, કાયદો અને વ્યવસ્થા જાળવવા માટે આરએસી (RAC) ના જવાનોને પણ સંવેદનશીલ વિસ્તારોમાં તૈનાત કરી દેવામાં આવ્યા છે. હાલમાં આખું શહેર પોલીસ છાવણીમાં ફેરવાઈ ગયું છે અને ઉચ્ચ અધિકારીઓ પોતે ઘટનાસ્થળે રહીને પરિસ્થિતિનું મોનિટરિંગ કરી રહ્યા છે. હોળી અને રમઝાન જેવા પવિત્ર તહેવારો એકસાથે હોવાથી કોઈ અનિચ્છનીય બનાવ ન બને તે માટે પોલીસે રાતભર કોમ્બિંગ હાથ ધર્યું હતું અને શાંતિ ડહોળવાનો પ્રયાસ કરનારા શંકાસ્પદ તત્વોની અટકાયત કરવાની પ્રક્રિયા તેજ કરી છે.

ટોંકના ડીએસપી મૃત્યુંજય મિશ્રાએ મીડિયા સાથેની વાતચીતમાં જણાવ્યું હતું કે, આ ઘટના કોઈ અચાનક ઉભી થયેલી નથી પરંતુ જૂની અદાવતનું પરિણામ છે. હાલમાં શહેરમાં સંપૂર્ણ શાંતિ છે અને જનતાને સોશિયલ મીડિયા પર ફેલાતી ભ્રામક અફવાઓ પર વિશ્વાસ ન કરવા વિનંતી કરવામાં આવી છે. બીજી તરફ, ભાજપના જિલ્લા પ્રમુખે આ હુમલાને સુનિયોજિત ગણાવીને દોષિતો સામે કડક કાર્યવાહીની માંગ કરી છે. પોલીસ અત્યારે બંને પક્ષોની લેખિત ફરિયાદની રાહ જોઈ રહી છે, જેના આધારે તોફાની તત્વો વિરુદ્ધ ગુનો નોંધી જેલના સળિયા પાછળ ધકેલવામાં આવશે. તહેવારોની મોસમમાં સાંપ્રદાયિક સૌહાર્દ જળવાઈ રહે તે માટે વહીવટીતંત્રે શાંતિ સમિતિની બેઠક બોલાવવાની પણ તૈયારી દર્શાવી છે.