જયપુર: રાજસ્થાનની રાજધાની અને 'પિંકસીટી' તરીકે જગવિખ્યાત જયપુરમાં આજે હોળીનો પર્વ આંતરરાષ્ટ્રીય રંગે રંગાયેલો જોવા મળ્યો હતો. શહેરની ઐતિહાસિક 'ખાસા કોઠી' હોટેલના પરિસરમાં રાજસ્થાન પર્યટન વિભાગ દ્વારા વિદેશી મહેમાનો માટે હોળીની ખાસ ઉજવણીનું આયોજન કરવામાં આવ્યું હતું. સફેદ કુર્તા-પાયજામા અને રાજસ્થાની સાફામાં સજ્જ વિદેશી પ્રવાસીઓ જ્યારે એકબીજા પર રંગો ઉડાડતા હતા, ત્યારે ભારતની ‘વસુધૈવ કુટુંબકમ’ની ભાવના સાચા અર્થમાં સાર્થક થતી દેખાતી હતી.
રંગોની સાથે સંસ્કૃતિનું આદાન-પ્રદાન
આ ખાસ કાર્યક્રમમાં અમેરિકા, યુરોપ અને એશિયાના વિવિધ દેશોમાંથી આવેલા પર્યટકોએ ભાગ લીધો હતો. પર્યટન વિભાગ દ્વારા મહેમાનોનું પરંપરાગત રીતે સ્વાગત કરવામાં આવ્યું હતું. વિદેશી મહેમાનોએ માત્ર અબીલ-ગુલાલથી હોળી જ ન રમી, પરંતુ તેઓએ ભારતીય પિચકારીઓ પકડીને એકબીજાને રંગબેરંગી પાણીથી ભીંજવી દીધા હતા. ફોટોગ્રાફર અંશુલ શર્માની તસવીરોમાં કેદ થયેલા આ દ્રશ્યોમાં વિદેશીઓના ચહેરા પરનો આનંદ સ્પષ્ટપણે જોઈ શકાતો હતો.
ઢોલના તાલે થિરક્યા વિદેશી પગ
હોળીની ઉજવણી માત્ર રંગો પૂરતી મર્યાદિત નહોતી. રાજસ્થાની લોકગાયકોએ જ્યારે ઢોલ અને નગારાના તાલે હોળીના ફાગ ગીતો ગાવાનું શરૂ કર્યું, ત્યારે વિદેશી પ્રવાસીઓ પણ પોતાની જાતને રોકી શક્યા નહીં. તેઓ સ્થાનિક કલાકારો સાથે મળીને દેશી લય પર ઝૂમતા જોવા મળ્યા હતા. અનેક પ્રવાસીઓએ આ ક્ષણોને પોતાના કેમેરા અને સોશિયલ મીડિયા લાઈવ દ્વારા દુનિયાભરમાં શેર કરી હતી.
જયપુરની મહેમાનગતિથી પ્રવાસીઓ ગદગદ
પર્યટકોએ જણાવ્યું હતું કે, તેઓએ હોળી વિશે ઘણું સાંભળ્યું હતું, પરંતુ જયપુરની ધરતી પર આ રીતે પ્રત્યક્ષ હોળી રમવાનો અનુભવ અદ્ભુત છે. પર્યટન વિભાગના અધિકારીઓના મતે, આવા આયોજનોથી રાજસ્થાનના પ્રવાસન ઉદ્યોગને વેગ મળે છે અને વિશ્વભરમાં ભારતીય તહેવારો પ્રત્યે આકર્ષણ વધે છે. આજે જયપુરની ગલીઓ અને હોટલો વિદેશીઓના 'બુરા ન માનો હોલી હૈ' ના નાદથી ગુંજી ઉઠી હતી.