ભીલવાડા: રાજસ્થાનના ભીલવાડા જિલ્લામાં આજે ભક્તિ અને સેવાના પ્રતીક સમાન ગૌશાળાનું નિર્માણ રણમેદાનમાં ફેરવાઈ ગયું હતું. કાલીરાડિયા ગામમાં ગૌશાળાના બાંધકામ બાબતે લાંબા સમયથી ચાલી રહેલા વિવાદે બુધવારે હિંસક સ્વરૂપ ધારણ કર્યું હતું. બે સમુદાયો વચ્ચે બોલાચાલીથી શરૂ થયેલો મામલો જોતજોતામાં લાકડીઓ, પથ્થરમારા અને ખૂની સંઘર્ષ સુધી પહોંચી જતાં સમગ્ર પંથકમાં ભારે અફડાતફડી મચી ગઈ હતી.
રણમેદાન બન્યું ગામ: ૮ લોકો ઘાયલ
ગૌશાળાના નિર્માણ સ્થળે બંને પક્ષના લોકો મોટી સંખ્યામાં સામસામે આવી ગયા હતા. રસ્તાઓ પર લાંબા સમય સુધી પથ્થરમારો ચાલ્યો હતો, જેમાં બંને પક્ષના કુલ ૮ લોકો ગંભીર રીતે ઘાયલ થયા છે. ઘાયલોને તાત્કાલિક હોસ્પિટલ ખસેડવામાં આવ્યા હતા, જે પૈકી એક વ્યક્તિની હાલત અત્યંત નાજુક હોવાથી તેને ભીલવાડાની મહાત્મા ગાંધી હોસ્પિટલમાં રીફર કરવામાં આવ્યો છે. ચીજવસ્તુઓની તોડફોડ અને લોકોના આક્રોશને કારણે ગ્રામજનોમાં પણ ફફડાટ ફેલાયો હતો.
પોલીસનો લોખંડી બંદોબસ્ત: આખી રાત પેટ્રોલિંગ
ઘટનાની જાણ થતાં જ મંડલગઢ અને આસપાસના પોલીસ સ્ટેશનનો કાફલો ઘટનાસ્થળે દોડી ગયો હતો. ASP પારસ જૈન અને ડેપ્યુટી બાબુલાલ બિશ્નોઈએ જાતે મોરચો સંભાળી ભીડને વિખેરી નાખી હતી. હાલ ગામમાં તણાવપૂર્ણ શાંતિ છે, પરંતુ પરિસ્થિતિ વધુ ન બગડે તે માટે આખું ગામ પોલીસ છાવણીમાં ફેરવાઈ ગયું છે. પોલીસની ટીમોએ આખી રાત ગામમાં પેટ્રોલિંગ કર્યું હતું જેથી કોઈ અનિચ્છનીય બનાવ ન બને.
તપાસનો ધમધમાટ
પોલીસ સ્ટેશન પ્રભારી મુન્ની રામે જણાવ્યું હતું કે, હિંસામાં સામેલ તત્વોની સીસીટીવી અને વીડિયો ફૂટેજના આધારે ઓળખ કરવામાં આવી રહી છે. ગૌશાળાના બાંધકામમાં કયા મુદ્દે વિવાદ થયો તે અંગે ઊંડાણપૂર્વક તપાસ હાથ ધરવામાં આવી છે. પોલીસ અત્યારે બંને પક્ષોને શાંતિ જાળવવા અપીલ કરી રહી છે અને કાયદેસરની કાર્યવાહીની તૈયારી કરી રહી છે.