તેહરાન:   ઈરાનના સૌથી શક્તિશાળી અને સર્વોચ્ચ નેતા આયાતુલ્લાહ અલી ખામેનીના નિધન બાદ સમગ્ર પશ્ચિમ એશિયામાં ભારેલા અગ્નિ જેવી સ્થિતિ છે. બુધવારે મોડી રાત્રે તેહરાનમાં યોજાનારા અંતિમ સંસ્કારને અચાનક મુલતવી રાખવાનો નિર્ણય લેવામાં આવ્યો છે, જેણે વૈશ્વિક સ્તરે અનેક તર્ક-વિતર્કો જન્માવ્યા છે. ઈરાની પ્રશાસન અને ઈસ્લામિક વિકાસ સંકલન પરિષદના મતે, આ વિલંબ પાછળનું મુખ્ય કારણ માત્ર અપેક્ષિત લાખોની મેદની જ નથી, પરંતુ ઈઝરાયેલ અને અમેરિકા દ્વારા આટલા મોટા જનમેદની પર સંભવિત હુમલો થવાનો ભય છે. 1989માં જ્યારે ખોમેનીના અંતિમ સંસ્કાર થયા હતા, ત્યારે કરોડો લોકો ઉમટી પડ્યા હતા, અને આ વખતે ખામેનીની લોકપ્રિયતા અને વર્તમાન યુદ્ધની સ્થિતિ જોતા સુરક્ષા એ સૌથી મોટો પડકાર બની ગઈ છે.

ખામેનીના વસિયતનામા મુજબ, તેમને તેમના જન્મસ્થળ અને શિયા ઈસ્લામના અત્યંત પવિત્ર ગણાતા મશહદ શહેરમાં ઈમામ રેઝા દરગાહ પાસે દફનાવવામાં આવશે. શનિવારે 86 વર્ષની વયે તેમનું અવસાન થયા બાદ ઈરાન તેના ઈતિહાસના સૌથી નાજુક તબક્કામાંથી પસાર થઈ રહ્યું છે. સૈન્ય, ન્યાયતંત્ર અને સરકાર પર સંપૂર્ણ પકડ ધરાવતા ખામેનીના શબને તેહરાનના પ્રાર્થના હોલમાં ત્રણ દિવસ સુધી અંતિમ દર્શન માટે રાખવાની યોજના છે, જેથી સમગ્ર દેશમાંથી આવતા શોકાતુર લોકો તેમના 'શહીદ ઈમામ' ને વિદાય આપી શકે. જોકે, હુમલાની આશંકાએ આ સમગ્ર પ્રક્રિયાને અત્યંત ગુપ્ત અને હાઈ-એલર્ટ હેઠળ લાવી દીધી છે.

તાજેતરના ઇઝરાયલી હુમલામાં ખામેનીના નિધન બાદ ઈરાને વળતો પ્રહાર કરવાની જે તૈયારીઓ કરી છે, તેના કારણે ક્ષેત્રમાં તણાવ ચરમસીમાએ છે. ખામેનીના પાર્થિવ શરીરને મશહદ લઈ જવાની નવી તારીખ હવે ટૂંક સમયમાં જાહેર કરવામાં આવશે, પરંતુ ત્યાં સુધી ઈરાનની સરહદો અને આકાશ પર કડક સૈન્ય દેખરેખ ગોઠવી દેવામાં આવી છે. સર્વોચ્ચ નેતાના અંતિમ સંસ્કારમાં થતો આ વિલંબ ઈરાનની આંતરિક સુરક્ષા નબળાઈ અને વિદેશી શક્તિઓના વધતા પ્રભાવ તરફ પણ આંગળી ચીંધે છે. હવે આખું વિશ્વ એ જોવાની રાહ જોઈ રહ્યું છે કે આ અંતિમ વિદાય શાંતિપૂર્ણ રહેશે કે પછી નવા મોટા સશસ્ત્ર સંઘર્ષની શરૂઆત કરશે.