કોલકાતા, તા. ૦૫: પશ્ચિમ બંગાળના પાટનગર કોલકાતા અને ગલ્ફના પ્રવેશદ્વાર ગણાતા દુબઈ વચ્ચેના હવાઈ સંબંધોમાં ચાર દિવસના લાંબા વિરામ બાદ આખરે હિલચાલ જોવા મળી છે. મધ્ય પૂર્વમાં ચાલી રહેલા સંઘર્ષ અને ઈરાન-ઈઝરાયેલ વચ્ચેના તણાવને કારણે લગભગ ૧૧૩ કલાક સુધી બંધ રહેલી ફ્લાઇટ સેવાઓ ગુરુવારે આંશિક રીતે ફરી શરૂ થઈ હતી. નેતાજી સુભાષ ચંદ્ર બોઝ આંતરરાષ્ટ્રીય વિમાનમથક પર વહેલી સવારે ૨:૪૦ વાગ્યે જ્યારે ફ્લાયદુબઈનું વિમાન ૧૩૦ મુસાફરો સાથે લેન્ડ થયું, ત્યારે ફસાયેલા પ્રવાસીઓના ચહેરા પર હાશકારો જોવા મળ્યો હતો.
નોંધનીય છે કે, ૨૮ ફેબ્રુઆરીએ એમિરેટ્સની છેલ્લી ફ્લાઇટ રવાના થયા બાદ કોલકાતાથી દુબઈ, દોહા અને અબુ ધાબી જેવા શહેરોનો સંપર્ક સંપૂર્ણપણે કપાઈ ગયો હતો. અમેરિકા અને ઈઝરાયેલ સાથેના વધતા તણાવને કારણે સુરક્ષાના કારણોસર એરસ્પેસ પર પ્રતિબંધો લાદવામાં આવ્યા હતા. ગુરુવારે આવેલું બોઇંગ 737 મેક્સ વિમાન નિર્ધારિત સમય કરતાં થોડું મોડું પડ્યું હતું, પરંતુ તેના આગમનને કારણે લાંબા સમયથી એરપોર્ટ પર અટવાયેલા મુસાફરો માટે આશાનું કિરણ જાગ્યું છે.
પરત જતી વેળાએ આ વિમાનમાં ૫૫ મુસાફરો દુબઈ જવા રવાના થયા હતા. જોકે, હજુ પણ ચિત્ર સંપૂર્ણપણે સ્પષ્ટ નથી. એરપોર્ટ અધિકારીઓના જણાવ્યા અનુસાર, મધ્ય પૂર્વના તમામ રૂટ ક્યારે સંપૂર્ણપણે કાર્યરત થશે તે કહેવું મુશ્કેલ છે. એરલાઇન્સ હજુ પણ 'વેઇટ એન્ડ વોચ'ની નીતિ અપનાવી રહી છે અને પેસેન્જરોને સલાહ આપવામાં આવી છે કે તેઓ એરપોર્ટ પર આવતા પહેલા પોતાની ફ્લાઇટનું સ્ટેટસ ચોક્કસપણે તપાસી લે.