નવી દિલ્હી, તા. ૦૫: મધ્ય પૂર્વમાં ચાલી રહેલા ભીષણ યુદ્ધ વચ્ચે યુક્રેનના રાષ્ટ્રપતિ વોલોડીમીર ઝેલેન્સકીએ રશિયાની વર્તમાન સ્થિતિ પર એક મોટો અને વ્યંગાત્મક ખુલાસો કર્યો છે. એક તાજેતરની મુલાકાતમાં ઝેલેન્સકીએ રશિયાની લશ્કરી તાકાતને લપડાક મારતા કહ્યું કે, રશિયા અત્યારે ઈરાનને બચાવવાની સ્થિતિમાં જ નથી. તેમણે કટાક્ષ કર્યો કે જે દેશ પોતે ચાર વર્ષથી યુક્રેન સામેના જંગમાં ફસાયેલો છે અને જેની સેના નિરાશ થઈ ગઈ છે, તે બીજાને શું મદદ કરશે?

ઝેલેન્સકીએ સ્પષ્ટ શબ્દોમાં જણાવ્યું કે, રશિયા પાસે હવે ઈરાનના સાથી તરીકે મેદાનમાં ઉતરવાની ક્ષમતા બચી નથી. તેમણે ઉમેર્યું, "રશિયાના મોટાભાગના સૈન્ય દળો કાં તો યુક્રેનની ધરતીમાં દટાયેલા છે અથવા અહીંના જંગમાં ભારે નુકસાન સહન કરી રહ્યા છે. અગાઉ સીરિયામાં પણ રશિયાની આવી જ લાચારી જોવા મળી હતી અને હવે ઈરાનના કિસ્સામાં પણ રશિયા માત્ર મર્યાદિત ભૂમિકા જ ભજવી શકશે."

શસ્ત્રોના પુરાવા અને ઈરાની ડ્રોનનું કનેક્શન

ઝેલેન્સકીએ રશિયા પર ગંભીર આરોપ લગાવતા કહ્યું કે, ઈરાન જે 'શાહેદ' ડ્રોનનો ઉપયોગ કરી રહ્યું છે, તેના કાટમાળમાંથી રશિયન ઇલેક્ટ્રોનિક સાધનો મળી આવ્યા છે. જોકે ઈરાને અગાઉ રશિયાને શસ્ત્રો આપ્યા હતા, પણ હવે પરિસ્થિતિ ઉલટી થઈ છે. હવે રશિયા ઈરાન પાસેથી ટેકનોલોજી લાયસન્સ લઈને પોતાના દેશમાં મિસાઇલો બનાવી રહ્યું છે. ઝેલેન્સકીએ ચિંતા વ્યક્ત કરી કે જો પશ્ચિમ એશિયાનું યુદ્ધ લાંબુ ચાલશે, તો અમેરિકાની સહાય યુક્રેનને બદલે ઇઝરાયેલ તરફ વળી શકે છે, જે રશિયા માટે ફાયદાકારક બની શકે છે.

વૈશ્વિક ઉર્જા સંકટનો ખતરો

આ યુદ્ધ માત્ર સીમાઓ પૂરતું મર્યાદિત નથી, પણ તેની અસર વૈશ્વિક ઉર્જા બજાર પર પણ પડી રહી છે. ઝેલેન્સકીએ ચેતવણી આપી છે કે તેલની આયાતમાં ઘટાડો અને ભાવમાં વધારો યુરોપ સહિત સમગ્ર વિશ્વ માટે મુશ્કેલી ઉભી કરી રહ્યો છે. યુક્રેન માને છે કે જો મધ્ય પૂર્વમાં શાંતિ નહીં સ્થપાય, તો તેની સીધી અસર આંતરરાષ્ટ્રીય સુરક્ષા સંતુલન પર પડશે અને રશિયા જેવા દેશો આ અસ્થિરતાનો દુરુપયોગ કરી શકે છે.