નવી દિલ્હી, તા. ૦૫: મધ્ય પૂર્વમાં ચાલી રહેલા ભીષણ સંઘર્ષ અને ઈરાનના સર્વોચ્ચ નેતા આયાતુલ્લાહ અલી ખામેનીના અવસાન બાદ ભારત સરકારે પોતાનું સત્તાવાર વલણ સ્પષ્ટ કર્યું છે. ગુરુવારે ભારતના વિદેશ સચિવ વિક્રમ મિસ્ત્રીએ નવી દિલ્હી સ્થિત ઈરાની દૂતાવાસની મુલાકાત લીધી હતી. તેમણે ત્યાં રાખવામાં આવેલી શોક પુસ્તિકામાં હસ્તાક્ષર કરી ભારત સરકાર વતી ઊંડી સંવેદના વ્યક્ત કરી હતી. ઈરાનમાં અત્યારે ૪૦ દિવસનો રાષ્ટ્રીય શોક જાહેર કરાયો છે ત્યારે ભારતનું આ પગલું બંને દેશો વચ્ચેના ઐતિહાસિક સંબંધોને ટકાવી રાખવાનો સંકેત આપે છે.

રાજકીય વિવાદ: મનીષ સિસોદિયા અને ખડગેના આકરા પ્રહારો

એક તરફ સરકાર શોક વ્યક્ત કરી રહી છે, ત્યારે બીજી તરફ દેશમાં આ મુદ્દે રાજકીય ઘમસાણ શરૂ થયું છે. આમ આદમી પાર્ટીના નેતા મનીષ સિસોદિયાએ વડાપ્રધાન નરેન્દ્ર મોદીના મૌન પર આકરા સવાલો ઉઠાવતા કહ્યું કે, "અમેરિકાએ ભારતને રશિયા પાસેથી તેલ ન ખરીદવા માટે સમજાવ્યું અને હવે યુદ્ધને કારણે તેલ પુરવઠો જોખમમાં છે. શું વડાપ્રધાને અમેરિકાને ખુશ કરવા માટે દેશના હિતો સાથે સમાધાન કર્યું છે?"

બીજી તરફ, કોંગ્રેસ અધ્યક્ષ મલ્લિકાર્જુન ખડગેએ હિંદ મહાસાગરમાં ઈરાની જહાજ 'આઈરિસ દેના' (IRIS Dena) ડૂબાડવાની ઘટના પર સરકારને ઘેરી છે. ખડગેએ જણાવ્યું કે, આ જહાજ ભારતના સત્તાવાર આમંત્રણ પર વિશાખાપટ્ટનમમાં આયોજિત 'ઇન્ટરનેશનલ ફ્લીટ રિવ્યૂ ૨૦૨૬' માં ભાગ લઈને પરત ફરી રહ્યું હતું. તે આપણું મહેમાન હતું અને તેના પર થયેલો હુમલો એ ભારતની વ્યૂહાત્મક સુરક્ષાની અવગણના છે.

વ્યૂહાત્મક સંતુલન જાળવવાનો પ્રયાસ

ભારત માટે આ પરિસ્થિતિ અત્યંત નાજુક છે. એકબાજુ અમેરિકા અને ઈઝરાયેલ સાથેની વ્યૂહાત્મક ભાગીદારી છે, તો બીજી બાજુ ઈરાન સાથેના જૂના આર્થિક અને ઊર્જા સંબંધો છે. ઈરાનમાં સર્જાયેલી અસ્થિરતા અને વધતો જતો પ્રાદેશિક તણાવ ભારત માટે ઈંધણના ભાવ અને સુરક્ષાની દ્રષ્ટિએ મોટો પડકાર બની શકે છે. હવે જોવાનું એ રહેશે કે ભારત સરકાર આંતરરાષ્ટ્રીય મંચ પર આ જટિલ મુદ્દે આગામી દિવસોમાં કેવો પક્ષ રજૂ કરે છે.