વૃંદાવન: વિશ્વભરના કૃષ્ણ ભક્તોની આસ્થાના કેન્દ્ર સમાન વૃંદાવનના બાંકે બિહારી મંદિરમાં અત્યારે ભક્તિની સાથે ભારે આક્રોશનો માહોલ જોવા મળી રહ્યો છે. મંદિરની વ્યવસ્થા સુધારવા માટે બનાવવામાં આવેલી હાઈ પાવર કમિટી (HPC) અને પરંપરાગત ગોસ્વામી સમુદાય વચ્ચે ગજગ્રાહ શરૂ થયો છે. વિવાદનું મુખ્ય કારણ વહીવટીતંત્ર દ્વારા દર્શનની વ્યવસ્થામાં કરવામાં આવી રહેલો ફેરફાર છે. પ્રશાસન ભીડને કાબૂમાં લેવા માટે ઠાકુરજીને ગર્ભગૃહને બદલે દરરોજ ‘જગમોહન’ (ગર્ભગૃહની બહારનો હોલ) માં બિરાજમાન કરવા માંગે છે, જેનો સેવકો સખત વિરોધ કરી રહ્યા છે.

મંદિરના મુખ્ય સેવાયત અનંત ગોસ્વામીના જણાવ્યા મુજબ, ઠાકુરજીને માત્ર વિશેષ તહેવારો કે ઉત્સવો પર જ જગમોહનમાં લાવવાની પરંપરા છે. જો આ વ્યવસ્થા દરરોજ અમલી બને તો તે સદીઓ જૂની મર્યાદાનું ઉલ્લંઘન ગણાશે. વધુમાં, ગોસ્વામી પરિવારોને ‘દેહરી પૂજન’ (મંદિરના ઉંબરાનું પૂજન) કરતા અટકાવવાના નિર્ણયથી પણ રોષ ભભૂકી ઉઠ્યો છે. સેવકોનો આરોપ છે કે સમિતિના સભ્યો પોતે પૂજા કરે છે પણ ભક્તો અને સેવકો પર પ્રતિબંધ મૂકીને બેવડા ધોરણો અપનાવી રહ્યા છે.

રેલિંગ કોન્ટ્રાક્ટ અને સરકારી ટ્રસ્ટનો વિવાદ

બાંકે બિહારી મંદિરમાં છેલ્લા એક વર્ષથી અનેક વિવાદોએ માથું ઊંચક્યું છે:

• રેલિંગ વિવાદ: ફેબ્રુઆરી ૨૦૨૬માં એક મુસ્લિમ પેઢીને સ્ટીલ રેલિંગનો કોન્ટ્રાક્ટ અપાતા સ્થાનિક સંતોએ ભારે હોબાળો કર્યો હતો.
• તિજોરીનો ભેદ: ઓક્ટોબર ૨૦૨૫માં ૧૯૭૧થી બંધ પડેલો તોશાખાના (તિજોરી) ખોલવામાં આવ્યો હતો, જેમાં અનેક પ્રાચીન દસ્તાવેજો અને કિંમતી વસ્તુઓ મળી આવી હતી.
• સુપ્રીમ કોર્ટમાં જંગ: યુપી સરકારના ૨૦૨૫ના ટ્રસ્ટ વટહુકમને સેવકોએ સુપ્રીમ કોર્ટમાં પડકાર્યો છે. હાલમાં મંદિરનું સંચાલન નિવૃત્ત ન્યાયાધીશની વચગાળાની સમિતિ કરી રહી છે.

વિદેશી ભક્તો પણ ચિંતામાં

વૃંદાવનની મુલાકાતે આવેલા વિદેશી ભક્તો પણ આ વિવાદથી અજાણ નથી. આધ્યાત્મિક શાંતિ માટે સાત સમંદર પારથી આવતા ભક્તોનું કહેવું છે કે, બાંકે બિહારીજીના ‘ઝાંકી દર્શન’ (પડદો વારંવાર ખૂલવો-બંધ થવો) એ આ મંદિરની અનોખી ઓળખ છે. જો નવી વ્યવસ્થામાં આ આધ્યાત્મિક અનુભવ ખોરવાશે તો મંદિરનું મૂળ તત્વ જોખમાશે. સ્વામી હરિદાસ દ્વારા સ્થાપિત આ પવિત્ર ધામમાં અત્યારે શ્રદ્ધા અને વહીવટી શિસ્ત વચ્ચે એક મોટો જંગ ખેલાઈ રહ્યો છે.