મુંબઈ: મહારાષ્ટ્ર વિધાનસભામાં આજે રજૂ કરવામાં આવેલા આર્થિક સર્વેક્ષણ ૨૦૨૫-૨૬ના અહેવાલે રાજ્યની મજબૂત આર્થિક સ્થિતિનું ચિત્ર રજૂ કર્યું છે. અહેવાલ મુજબ, આગામી નાણાકીય વર્ષમાં રાજ્યનો વિકાસ દર ૭.૯% રહેવાનો અંદાજ છે, જે ગયા વર્ષના ૭.૩% કરતા ઘણો વધારે છે. આ આંકડાઓ દર્શાવે છે કે મહારાષ્ટ્ર માત્ર ભારતનું સૌથી મોટું અર્થતંત્ર જ નથી, પરંતુ તે રાષ્ટ્રીય જીડીપીમાં ૧૪% ના સૌથી વધુ યોગદાન સાથે દેશના વિકાસની ગતિ નક્કી કરી રહ્યું છે.

રાજ્યના સર્વાંગી વિકાસમાં સેવા ક્ષેત્રે ૯% ના ગ્રોથ રેટ સાથે સિંહફાળો આપ્યો છે, જેમાં રિયલ એસ્ટેટ અને નાણાકીય સેવાઓનો મુખ્ય રોલ રહ્યો છે. ખેતી ક્ષેત્રે પણ કુદરતે મહેરબાની કરી છે; સામાન્ય કરતા ૧૦૯% વરસાદ પડવાને કારણે કૃષિ ઉત્પાદનમાં વધારો નોંધાયો છે. મહારાષ્ટ્ર હવે દૂધ ઉત્પાદનમાં પણ દેશમાં પાંચમા ક્રમે પહોંચી ગયું છે.

આંકડાની નજરે મહારાષ્ટ્રની પ્રગતિ:

• માથાદીઠ આવક: રાજ્યના નાગરિકોની સરેરાશ વાર્ષિક આવક વધીને ₹૩,૪૭,૯૦૩ થવાનો અંદાજ છે.
• વિદેશી રોકાણ (FDI): ભારતમાં આવતા કુલ વિદેશી રોકાણમાંથી ૩૧% એકલું મહારાષ્ટ્ર આકર્ષી રહ્યું છે.
• ગ્રીન એનર્જી: પુનઃપ્રાપ્ય ઉર્જા ક્ષમતા વધીને ૧૪,૧૧૩ મેગાવોટ થઈ છે.
• ગરીબ કલ્યાણ: પ્રધાનમંત્રી આવાસ યોજના હેઠળ ગ્રામીણ અને શહેરી વિસ્તારોમાં ૨૪ લાખથી વધુ ઘરોનું નિર્માણ થયું છે.
• જળ શક્તિ: ૯૦% પરિવારોને નળ દ્વારા પીવાનું શુદ્ધ પાણી પહોંચાડવામાં રાજ્ય સફળ રહ્યું છે.

નાણા અને આયોજન રાજ્યમંત્રી આશિષ જયસ્વાલ દ્વારા રજૂ કરાયેલા આ અહેવાલ બાદ હવે સૌની નજર આવતીકાલ પર ટકેલી છે. આવતીકાલે મુખ્યમંત્રી અને નાણામંત્રી દેવેન્દ્ર ફડણવીસ રાજ્યનું પૂર્ણ બજેટ રજૂ કરશે. આર્થિક સર્વેક્ષણના સકારાત્મક આંકડાઓને જોતા મહારાષ્ટ્રવાસીઓને આ બજેટમાં મોટી રાહતો અને વિકાસની નવી યોજનાઓની અપેક્ષા છે. ખાસ કરીને શિક્ષણ, આરોગ્ય અને ઈન્ફ્રાસ્ટ્રક્ચર ક્ષેત્રે સરકાર વધુ ફંડ ફાળવી શકે છે.