નવી દિલ્હી: હિંદ મહાસાગરના શાંત પાણી હવે મહાસત્તાઓના સંઘર્ષને કારણે તોફાની બન્યા છે. અમેરિકન સબમરીન દ્વારા ઈરાની ફ્રિગેટ 'IRIS દેના' ને ટોર્પિડો મારી ડૂબાડી દેવાયા બાદ ભારતીય નૌકાદળ (Indian Navy) એ અત્યંત ઝડપી શોધ અને બચાવ કામગીરી (SAR) શરૂ કરી છે. ઈરાની જહાજ જ્યારે ભારતના વિશાખાપટ્ટનમથી પરત ફરી રહ્યું હતું ત્યારે શ્રીલંકાના ગાલેથી ૨૦ નોટિકલ માઈલ દૂર તેના પર હુમલો થયો હતો.

આ સંકટ સમયે શ્રીલંકાના નૌકાદળ સાથે ખભેખભા મિલાવીને ભારતે તેના લાંબા અંતરના દરિયાઈ પેટ્રોલિંગ વિમાનો અને બે શક્તિશાળી યુદ્ધ જહાજો મેદાનમાં ઉતાર્યા છે. આ ઓપરેશનનો હેતુ સમુદ્રમાં ગુમ થયેલા ખલાસીઓને શોધવાનો અને ઈજાગ્રસ્તોને તબીબી સહાય પહોંચાડવાનો છે.

કેવી રીતે ચાલી રહ્યું છે ‘રેસ્ક્યુ ઓપરેશન’?

• હવાઈ નિરીક્ષણ: ભારતે ૪ માર્ચે સવારે જ લાંબા અંતરનું પેટ્રોલિંગ વિમાન લોન્ચ કર્યું હતું. અન્ય એક વિમાન હવામાંથી છોડી શકાય તેવા ‘લાઈફ રાફ્ટ્સ’ (જીવન બચાવવાની નૌકાઓ) સાથે સ્ટેન્ડબાય રાખવામાં આવ્યું છે.
• INS તરંગિની: આ જહાજ જે નજીકમાં જ હતું, તે ૪ માર્ચે સાંજે જ ઘટનાસ્થળે પહોંચી ગયું હતું અને શોધખોળ શરૂ કરી દીધી હતી.
• INS ઇક્ષક: સર્ચ ઓપરેશનને વધુ મજબૂત કરવા માટે આ જહાજને કોચીથી રવાના કરવામાં આવ્યું છે, જે અત્યાધુનિક સાધનોની મદદથી ગુમ થયેલા કર્મચારીઓની શોધ કરી રહ્યું છે.

અમેરિકાના પ્રહારથી ખળભળાટ

બીજી તરફ, અમેરિકાના સંરક્ષણ સચિવ પીટ હેગસેથે આ હુમલાને વોશિંગ્ટન માટે “મોટી જીત” ગણાવી છે. તેમણે પુષ્ટિ કરી કે રાષ્ટ્રપતિ ટ્રમ્પના સીધા આદેશથી આ વિનાશક ઓપરેશન પાર પાડવામાં આવ્યું છે. આ હુમલામાં ૮૭ ઈરાની ખલાસીઓના મોત થયા હોવાનું મનાય છે, જ્યારે ૩૨ લોકોને શ્રીલંકાના નૌકાદળે બચાવી લીધા છે.

ભારતીય નૌકાદળ દ્વારા લેવામાં આવેલા આ પગલાને આંતરરાષ્ટ્રીય સ્તરે "જહાજ ભંગાણ પામેલા કર્મચારીઓ માટેના માનવતાવાદી કાર્ય" તરીકે જોવામાં આવી રહ્યું છે. ભલે વૈશ્વિક રાજનીતિ ગમે તે હોય, પરંતુ સમુદ્રમાં મુશ્કેલીમાં મુકાયેલા માનવીઓને બચાવવાની પોતાની પરંપરા ભારતે જાળવી રાખી છે.