કાઠમંડુ, તા.૬: નેપાળમાં  યોજાયેલા ઐતિહાસિક મતદાન બાદ આજે જ્‍યારે મતપેટીઓ ખુલી રહી છે, ત્‍યારે પરિણામો ચોંકાવનારા આવી રહ્યા છે. ગત વર્ષે થયેલા હિંસક જનરલ-ઝેડ આંદોલન અને કેપી શર્મા ઓલીની સરકારના પતન પછી આ ચૂંટણી દેશ માટે ર્ટનિંગ પોઈન્‍ટ માનવામાં આવી રહી છે. પ્રારંભિક ૪૩ બેઠકોના વલણોમાં બાલેન શાહની રાષ્‍ટ્રીય સ્‍વતંત્ર પાર્ટી એ ૩૫ બેઠકો પર મજબૂત લીડ મેળવીને રાજકીય વિશ્‍લેષકોને સ્‍તબ્‍ધ કરી દીધા છે. વર્ષોથી સત્તા પર રહેલા દિગ્‍ગજ નેતાઓ સામે યુવા પેઢીનો આક્રોશ હવે બેલેટ પેપર દ્વારા સ્‍પષ્ટપણે દેખાઈ રહ્યો છે.

સૌથી મોટો ઉલટફેર ઝાપા-૫ બેઠક પર જોવા મળી રહ્યો છે, જ્‍યાં પૂર્વ વડાપ્રધાન કેપી શર્મા ઓલી પોતે બાલેન શાહ સામે પાછળ ચાલી રહ્યા હોવાના અહેવાલો છે. બાલેન શાહ, જેઓ વ્‍યવસાયે સિવિલ એન્‍જિનિયર અને લોકપ્રિય રૅપર છે, તેમણે કોર્પોરેટ સ્‍ટાઈલ અને પારદર્શિતાના વાયદા સાથે ચૂંટણી મેદાનમાં ઝંપલાવ્‍યું છે. નેપાળી કોંગ્રેસ માત્ર ૪ અને CPN-UML 3 બેઠકો પર સમેટાઈ રહી હોય તેવું લાગે છે. ૪૯ વર્ષીય ગગન થાપા પણ મેદાનમાં છે, પરંતુ અત્‍યારે તમામની નજર બાલેન શાહ પર છે, જેમણે જૂના નેતાઓના સિન્‍ડિકેટ રાજને ખતમ કરવાની કસમ ખાધી છે.

જો આ વલણો અંતિમ પરિણામોમાં પરિવર્તિત થાય છે, તો ૩૫ વર્ષીય બાલેન શાહ નેપાળના સૌથી યુવા વડાપ્રધાન બની શકે છે. કાઠમંડુના મેયર તરીકેની તેમની સફળ ઇનિંગ અને સોશિયલ મીડિયા પર યુવાનોમાં તેમની પકડ આ જીતનું મુખ્‍ય કારણ મનાય છે. ભ્રષ્ટાચાર, બેરોજગારી અને આર્થિક અસ્‍થિરતાથી કંટાળેલા નેપાળી મતદારોએ આ વખતે નોટબંધી જેવો જ જોરદાર ફટકો જૂની પાર્ટીઓને માર્યો છે. હવે જોવાનું એ રહેશે કે શું બાલેન શાહ ગઠબંધન વગર સરકાર બનાવી શકશે કે પછી નેપાળ ફરી એકવાર ગઠબંધન સરકારના ખેલમાં ફસાશે.

આ ચૂંટણી માત્ર નેપાળ માટે જ નહીં, પરંતુ સમગ્ર દક્ષિણ એશિયા માટે મહત્‍વની છે. ભારત અને ચીન બંને દેશો આ બદલાતા રાજકીય પ્રવાહ પર નજીકથી નજર રાખી રહ્યા છે. જો બાલેન શાહની પાર્ટી અંતિમ પરિણામોમાં પણ આ જ રીતે આગળ રહેશે, તો નેપાળની વિદેશ નીતિ અને આર્થિક સુધારાના એજન્‍ડામાં આમૂલ પરિવર્તન આવવાની શકયતા છે. શુક્રવાર સાંજ સુધીમાં જ્‍યારે ચિત્ર એકદમ સ્‍પષ્ટ થશે, ત્‍યારે કદાચ નેપાળના ઇતિહાસમાં પ્રથમ વખત કોઈ બિન-પરંપરાગત શક્‍તિ સત્તાના કેન્‍દ્રમાં હશે.

અંતિમ ગણતરીના કલાકો જેમ જેમ નજીક આવી રહ્યા છે, તેમ તેમ કાઠમંડુની સડકો પર બાલેન શાહના નારા ગુંજી રહ્યા છે. યુવા મતદારો તેને પોતાના મસીહા તરીકે જોઈ રહ્યા છે જે જૂના અને નિષ્‍ફળ ગયેલા રાજકારણીઓના પ્રભાવમાંથી દેશને મુક્‍ત કરાવશે. આ વલણોએ સાબિત કરી દીધું છે કે નેપાળની જનરલ-ઝેડ પેઢી હવે માત્ર પ્રેક્ષક બનીને રહેવા માંગતી નથી, પરંતુ સત્તાની લગામ પોતાના હાથમાં લેવા તૈયાર છે. આવતીકાલનો સૂર્યોદય નેપાળ માટે એક નવા રાજકીય સવારની આશા લઈને આવશે.