સિંગાપોર: તા.૦૬ વિશ્વના નકશા પર લઘુચિહ્ન સમાન પરંતુ સમૃદ્ધ એવા સિંગાપોરે તેના ભારતીય સમુદાયના મૂળિયાં વધુ મજબૂત કરવા માટે એક ઐતિહાસિક કદમ ઉઠાવ્યું છે. સિંગાપોર સરકાર આગામી પાંચ વર્ષ માટે 'ભારતીય જોડાણ અને વિકાસ પહેલ' (INEI) સમિતિની સ્થાપના કરી રહી છે. આ સમિતિનો મુખ્ય ઉદ્દેશ્ય સિંગાપોરમાં વસતા ભારતીયોની સામાજિક ઓળખને ગાઢ બનાવવી, યુવાનોમાં નેતૃત્વના ગુણો વિકસાવવા અને વિવિધ ભારતીય સંગઠનો વચ્ચે મજબૂત સેતુ બાંધવાનો છે.
આ મહત્વપૂર્ણ સમિતિની કમાન ભારતીય મૂળના બે દિગ્ગજ મંત્રીઓ, મુરલી પિલ્લઈ અને દિનેશ વાસુ દાશને સોંપવામાં આવી છે. ખાસ વાત એ છે કે આ પહેલ માત્ર સરકારી સ્તરે જ નહીં, પરંતુ ૧૫૦થી વધુ ભારતીય સંગઠનો અને સેંકડો યુવા નેતાઓ સાથેના પરામર્શ બાદ લેવામાં આવી છે. આવતા મહિનાથી 'INEI ફોરમ'ના માધ્યમથી વાર્ષિક સંવાદોનો દોર શરૂ થશે, જે સમુદાયના પાયાના પ્રશ્નો અને પ્રગતિ પર ધ્યાન કેન્દ્રિત કરશે.
બીજી તરફ, આધુનિકતાના પ્રવાહમાં પરંપરાગત કલા ભૂલાતી ન જાય તે માટે સિંગાપોર સરકારે ૨૦ મિલિયન સિંગાપોર ડોલર (આશરે ₹૧૨૪ કરોડ) ની તોતિંગ ગ્રાન્ટ જાહેર કરી છે. સિંગાપોરના મંત્રીઓએ ચિંતા વ્યક્ત કરી હતી કે આજની પેઢી પરંપરાગત ભારતીય નૃત્યોને બદલે કે-પોપ (K-Pop) તરફ વળી રહી છે. આ વારસાને બચાવવા માટે માર્ચ ૨૦૨૬થી તમામ શાળાઓમાં 'એથનિક ફ્યુઝન ડાન્સ' કાર્યક્રમો શરૂ કરવામાં આવશે. સિંગાપોરની આ બહુસાંસ્કૃતિકતાની એક સુંદર ઝલક તાજેતરમાં જોવા મળી હતી જ્યારે હિન્દુ મંદિરમાં ચીની 'લાયન ડાન્સ' અને ભગવાન મુરુગનનો અભિષેક એકસાથે યોજાયા હતા, જે વિશ્વભરમાં સાંપ્રદાયિક એકતાનું ઉત્તમ ઉદાહરણ પૂરું પાડે છે.