મુંબઈ: તા.૦૬ મહારાષ્ટ્રના મુખ્યમંત્રી દેવેન્દ્ર ફડણવીસે રાજ્યના બજેટ ૨૦૨૬માં આધુનિક યુગના સૌથી ઝડપથી વિકસતા ક્ષેત્ર એટલે કે 'એનિમેશન, વિઝ્યુઅલ ઇફેક્ટ્સ અને ગેમિંગ' (AVGC) પર વિશ્વાસ વ્યક્ત કરીને યુવાનો માટે મોટી જાહેરાત કરી છે. રાજ્ય સરકાર મુંબઈ અને પુણેને વૈશ્વિક કક્ષાના ગેમિંગ સેન્ટર તરીકે વિકસાવવા માટે સજ્જ થઈ છે, જેનાથી આગામી સમયમાં અંદાજે ૪ લાખ જેટલી ઉચ્ચ કુશળ નોકરીઓનું સર્જન થશે.
મુખ્યમંત્રીએ બજેટ રજૂ કરતા જણાવ્યું હતું કે, મહારાષ્ટ્રને આ ક્ષેત્રમાં ગ્લોબલ લીડર બનાવવા માટે રાજ્યભરમાં ૨૯૫ થી વધુ હાઈ-ટેક ગેમિંગ સ્ટુડિયો સ્થાપવામાં આવશે. ખાસ કરીને મુંબઈની ફિલ્મ ઇન્ડસ્ટ્રી (બોલિવૂડ) અને પુણેના આઈટી હબનો સમન્વય કરીને એક એવો 'ટ્વીન-સિટી કોરિડોર' તૈયાર કરાશે જે $50 બિલિયનની અર્થવ્યવસ્થાના સ્વપ્નને સાકાર કરવામાં મુખ્ય એન્જિન બનશે. પુણે અત્યારે જે રીતે ગ્લોબલ કેપેબિલિટી સેન્ટર્સ (GCCs) માટે પસંદગીનું સ્થળ બન્યું છે, તેને આ બજેટથી નવી ઊંચાઈ મળશે.
આ પ્રોજેક્ટ હેઠળ ૨૫૦ થી વધુ મોટા સ્ટુડિયો સ્થાપવાને પ્રાથમિકતા આપવામાં આવશે. કેન્દ્ર સરકાર દ્વારા સમર્થિત 'ઇન્ડિયન ઇન્સ્ટિટ્યૂટ ઓફ ક્રિએટિવ ટેકનોલોજી'ની સ્થાપના આ વિઝનનો પાયો ગણાશે. મુંબઈ માટે આ જાહેરાત એટલા માટે મહત્વની છે કારણ કે અત્યાર સુધી માત્ર ફિલ્મો પર નિર્ભર રહેતું આ શહેર હવે એનિમેશન અને ઇન્ટરેક્ટિવ મનોરંજન માટે લોન્ચપેડ બનશે. આ ક્ષેત્રમાં પરંપરાગત ફિલ્મો કરતાં નિકાસની ક્ષમતા અને રોજગારની તકો અનેકગણી વધારે છે, જે મહારાષ્ટ્રના અર્થતંત્રને સુપરચાર્જ કરશે.