રાજકોટ: તા.૦૬ દર વર્ષે ૮ માર્ચના રોજ સમગ્ર વિશ્વ 'આંતરરાષ્ટ્રીય મહિલા દિવસ' (International Women’s Day) ની ઉજવણી કરે છે. આ દિવસ માત્ર ગુલાબ કે ભેટ સોગાદો આપવાનો નથી, પરંતુ સદીઓથી ચાલી આવતી અસમાનતા સામે મહિલાઓએ લડેલી મક્કમ લડાઈની યાદ અપાવવાનો છે. વર્ષ ૨૦૨૬માં આ દિવસ વધુ ખાસ બની રહ્યો છે, કારણ કે આ વર્ષની થીમ મહિલાઓને માત્ર સન્માન જ નહીં, પરંતુ વાસ્તવિક અધિકારો અને ન્યાય અપાવવા પર કેન્દ્રિત છે.

શું છે આ વર્ષની ખાસ થીમ?

વર્ષ ૨૦૨૬ માટે સંયુક્ત રાષ્ટ્ર (UN) દ્વારા "અધિકારો. ન્યાય. કાર્યવાહી. બધી મહિલાઓ અને છોકરીઓ માટે" થીમ રાખવામાં આવી છે. આ થીમ સ્પષ્ટ સંદેશ આપે છે કે હવે માત્ર વાતો કરવાનો સમય પૂરો થયો છે, હવે નક્કર 'કાર્યવાહી' (Action) કરવાની જરૂર છે. બીજી તરફ, IWD ની સત્તાવાર વેબસાઇટ મુજબ "ગેઇન ટુ ગેઇન" થીમ પર ભાર મૂકવામાં આવ્યો છે, જેનો અર્થ છે કે જો સમાજ મહિલાઓને યોગ્ય માર્ગદર્શન અને સંસાધનો આપશે, તો બદલામાં આખો સમુદાય વધુ મજબૂત અને ટકાઉ વિકાસ પ્રાપ્ત કરશે.

સંઘર્ષથી સન્માન સુધીની સફર: એક નજર ઇતિહાસ પર

મહિલા દિવસની શરૂઆત કોઈ ઉત્સવ તરીકે નહીં, પણ એક ક્રાંતિ તરીકે થઈ હતી:

• ૧૯૦૯: અમેરિકામાં ૧૫,૦૦૦ મહિલાઓએ વધુ સારા પગાર અને મતદાનના અધિકાર માટે મોરચો માંડ્યો, જેનાથી પ્રથમ રાષ્ટ્રીય મહિલા દિવસની શરૂઆત થઈ.
• ૧૯૧૧: ઓસ્ટ્રિયા, ડેનમાર્ક, જર્મની અને સ્વિટ્ઝર્લેન્ડમાં સત્તાવાર રીતે પ્રથમ આંતરરાષ્ટ્રીય મહિલા દિવસ ઉજવાયો.
• ૧૯૧૭: રશિયન મહિલાઓએ 'શાંતિ અને રોટી' માટે આંદોલન કર્યું, જેણે વિશ્વભરમાં મહિલાઓના અવાજને મજબૂતી આપી.

આજે પણ મહિલાઓ સમક્ષ અનેક પડકારો છે, પરંતુ આ દિવસ આપણને યાદ અપાવે છે કે જ્યારે નારી શક્તિ એકજૂથ થાય છે, ત્યારે ઇતિહાસ બદલાય છે. આ વર્ષનો મહિલા દિવસ લિંગ અસમાનતા અને હિંસા સામે લડવા માટે એક મજબૂત પ્લેટફોર્મ પૂરું પાડશે.