કૂચ બિહાર:પશ્ચિમ બંગાળમાં આગામી એપ્રિલ મહિનામાં યોજાનારી વિધાનસભા ચૂંટણી પહેલા રાજકીય ગરમાવો તેની પરાકાષ્ઠાએ પહોંચ્યો છે. કોલકાતામાં મુખ્યમંત્રી મમતા બેનર્જી દ્વારા મતદાર યાદીમાંથી નામ કાઢી નાખવાના વિરોધમાં શરૂ કરાયેલા ધરણા પર ભાજપે આકરા પ્રહાર કર્યા છે. કેન્દ્રીય મંત્રી સુકાંત મજુમદારે કૂચ બિહારમાં 'પોરીબોર્ટન યાત્રા' દરમિયાન મમતા બેનર્જીની મજાક ઉડાવતા કહ્યું કે, "આ ધરણા એ બીજું કંઈ નહીં પણ આગામી ચૂંટણીમાં હાર્યા બાદ વિપક્ષમાં બેસીને શું કરવાનું છે, તેનું દીદી અત્યારથી રિહર્સલ કરી રહ્યા છે."

મજુમદારે દાવો કર્યો હતો કે બંગાળની જનતા હવે પરિવર્તન ઈચ્છે છે અને ભાજપ સત્તામાં આવતાની સાથે જ રાજ્યના સરકારી કર્મચારીઓ માટે ૪૫ દિવસની અંદર 'સાતમા પગાર પંચ'ની જાહેરાત કરશે. તેમણે વધુમાં ઉમેર્યું કે યુવાનોને હવે સરકાર તરફથી મળતી નજીવી મદદ નહીં પણ કાયમી નોકરીઓ જોઈએ છે. જો ભાજપની સરકાર બનશે તો દર વર્ષે સ્કૂલ સર્વિસ કમિશન (SSC) દ્વારા પારદર્શક ભરતી કરવામાં આવશે અને ખાલી પડેલી તમામ જગ્યાઓ ડિસેમ્બર સુધીમાં ભરી દેવામાં આવશે.

મહિલા મતો મેળવવા ભાજપનો મોટો દાવ

તૃણમૂલ કોંગ્રેસની લોકપ્રિય 'લક્ષ્મી ભંડાર' યોજનાને ટક્કર આપવા માટે સુકાંત મજુમદારે નવી 'અન્નપૂર્ણા ભંડાર' યોજનાની જાહેરાત કરી છે. તેમણે વચન આપ્યું છે કે ભાજપ સરકાર દરેક મહિલાને હાલમાં મળતા ₹૧,૫૦૦ ને બદલે ₹૩,૦૦૦ની આર્થિક સહાય પૂરી પાડશે. ૨૯૪ બેઠકો ધરાવતી પશ્ચિમ બંગાળ વિધાનસભા માટે એપ્રિલમાં મતદાન થવાની શક્યતા છે, ત્યારે ભાજપના આ આક્રમક વચનો અને મમતા બેનર્જીના ધરણાએ બંગાળના રાજકારણને હાઈ-વોલ્ટેજ ડ્રામામાં ફેરવી દીધું છે.

ગૃહમંત્રી અમિત શાહના વચનોને દોહરાવતા મજુમદારે વિશ્વાસ વ્યક્ત કર્યો કે આ વખતે બંગાળમાં ભાજપનો મુખ્યમંત્રી શપથ લેશે. હવે જોવાનું એ રહેશે કે બંગાળની જનતા 'દીદી'ના ધરણા પર ભરોસો મૂકે છે કે ભાજપના આ 'બમ્પર' વચનો પર.