નવી દિલ્હી : મધ્ય પૂર્વમાં ઈરાન અને ઈઝરાયેલ વચ્ચે ફાટી નીકળેલા જંગને કારણે વૈશ્વિક સ્તરે તેલના ભાવમાં ભડકો થયો છે, ત્યારે ભારત સરકારે અત્યંત મક્કમ રાજદ્વારી વલણ અપનાવ્યું છે. અમેરિકા દ્વારા રશિયા પાસેથી તેલ ખરીદવા માટે ભારતને આપવામાં આવેલી કથિત 'છૂટ' અથવા પરવાનગી પર પ્રતિક્રિયા આપતા કેન્દ્ર સરકારે સ્પષ્ટ કર્યું છે કે ભારત એક સાર્વભૌમ રાષ્ટ્ર છે અને તેને પોતાના રાષ્ટ્રીય હિતમાં તેલ ખરીદવા માટે દુનિયાના કોઈ પણ દેશની મંજૂરીની જરૂર નથી. શનિવારે જારી કરાયેલા નિવેદનમાં ભારતે ગર્જના કરી છે કે જ્યાંથી સૌથી સસ્તું અને શ્રેષ્ઠ ભાવે તેલ મળશે, ત્યાંથી ભારત તેની આયાત ચાલુ રાખશે.

હોર્મુઝ સ્ટ્રેટમાં સર્જાયેલા યુદ્ધ જેવા તણાવ છતાં ભારતનો ઉર્જા પુરવઠો સંપૂર્ણપણે સુરક્ષિત હોવાનો સરકારે વિશ્વાસ વ્યક્ત કર્યો છે. ભારતે છેલ્લા કેટલાક વર્ષોમાં અત્યંત ચતુરાઈપૂર્વક પોતાના તેલ પુરવઠાના સ્ત્રોતોનું વૈવિધ્યીકરણ કર્યું છે, જે હવે 27 થી વધીને 40 દેશો સુધી પહોંચી ગયું છે. આ વ્યૂહરચનાને કારણે ભારત કોઈ એક સપ્લાય રૂટ કે દેશ પર નિર્ભર રહ્યું નથી. ફેબ્રુઆરી 2026 માં પણ રશિયા ભારતનો સૌથી મોટો ક્રૂડ ઓઈલ સપ્લાયર જળવાઈ રહ્યો છે, અને પશ્ચિમી દેશોના દબાણ છતાં ડિસ્કાઉન્ટેડ ભાવે તેલની આ આયાત ભારતની આર્થિક સ્થિરતા માટે કરોડરજ્જુ સમાન સાબિત થઈ છે.

દેશની ઉર્જા સુરક્ષાના આંકડા રજૂ કરતા કેન્દ્રએ જણાવ્યું કે હાલમાં ભારત પાસે 250 મિલિયન બેરલથી વધુ ક્રૂડ ઓઈલ અને પેટ્રોલિયમ ઉત્પાદનોનો સ્ટોક ઉપલબ્ધ છે, જે આગામી 8 અઠવાડિયા સુધીના અવિરત વપરાશ માટે પૂરતો છે. ભારતની વાર્ષિક 258 મિલિયન મેટ્રિક ટનની રિફાઇનિંગ ક્ષમતા સ્થાનિક માંગ કરતા પણ વધુ છે, જે કોઈ પણ કટોકટી સામે લડવા માટે સક્ષમ છે. આમ, જ્યારે વિશ્વ તેલની અછતથી ડરી રહ્યું છે, ત્યારે ભારત પોતાની સ્વાયત્ત વિદેશ નીતિ અને મજબૂત રિઝર્વના જોરે ગ્લોબલ પાવર તરીકે ઉભરી આવ્યું છે.