દુબઈ: રેતીના રણમાં ઉભેલા ગગનચુંબી ઈમારતોના શહેર દુબઈમાં હવે ભારતીયોનો સિક્કો વાગી રહ્યો છે. વર્ષ 2025 માં દુબઈના રહેણાંક પ્રોપર્ટી માર્કેટમાં ભારતીય રોકાણકારો સૌથી મોટા વિદેશી ખરીદદારો તરીકે ઉભરી આવ્યા છે. એનારોક પ્રોપર્ટી કન્સલ્ટન્ટ્સના તાજેતરના અહેવાલ મુજબ, ભારતીયોએ આ વર્ષે દુબઈમાં અંદાજે ₹85,000 થી ₹95,000 કરોડનું જંગી રોકાણ કરીને ઘર ખરીદ્યા છે.
બ્રિટન અને ચીનને પછાડ્યા
દુબઈમાં વિદેશીઓ દ્વારા થતા મિલકત વ્યવહારોમાં ભારતીયોનો હિસ્સો 2023 માં માત્ર 12% હતો, જે 2025 માં વધીને સીધો 23% પર પહોંચી ગયો છે. આ રેસમાં ભારતે યુકે (બીજા નંબરે) અને ચીન (ત્રીજા નંબરે) જેવા દેશોને પણ પાછળ છોડી દીધા છે. ભલે પશ્ચિમ એશિયામાં ભૌગોલિક તણાવ હોય, પરંતુ રોકાણકારો માટે દુબઈ હજુ પણ સુરક્ષિત સ્વર્ગ સમાન છે.
દુબઈ જ કેમ પસંદ છે ભારતીયોને?
ભારતીય રોકાણકારોના આ આકર્ષણ પાછળ મુખ્ય ત્રણ કારણો જવાબદાર છે:
1.    વધારે ભાડાની ઉપજ: ભારતમાં પ્રોપર્ટી પર ભાડાની આવક (Rental Yield) માંડ 2-3% હોય છે, જ્યારે દુબઈમાં આ આંકડો 6% થી 8% જેટલો ઉંચો છે.
2.    ચલણની સ્થિરતા: યુએઈ દિરહામ (AED) અમેરિકી ડોલર સાથે જોડાયેલ હોવાથી રોકાણ સુરક્ષિત રહે છે.
3.    નજીકનું અંતર: ભારતથી દુબઈ માત્ર થોડા જ કલાકોની ફ્લાઇટના અંતરે હોવાથી મેનેજમેન્ટ સરળ રહે છે.
એપાર્ટમેન્ટ્સ અને વિલાની બોલબાલા
એનારોક ગ્રુપના જણાવ્યા અનુસાર, ભારતીયોમાં મુખ્યત્વે લક્ઝરી એપાર્ટમેન્ટ્સ અને આલીશાન વિલાની ભારે માંગ છે. ઘણા ભારતીયો તેને રહેવા માટે નહીં પરંતુ શુદ્ધ રોકાણ (Investment Property) તરીકે જોઈ રહ્યા છે. દુબઈના ડેવલપર્સ પણ હવે વિદેશી ખરીદદારો માટે 'રેન્ટલ મેનેજમેન્ટ' જેવી સુવિધાઓ આપી રહ્યા છે, જેના કારણે પ્રોપર્ટીની સંભાળ રાખવી સરળ બની છે.
ભૌગોલિક તણાવને કારણે ટૂંકા ગાળા માટે રોકાણકારોમાં થોડી સાવધાની જોવા મળી શકે છે, પરંતુ વૈશ્વિક નાણાકીય કેન્દ્ર તરીકે દુબઈની મજબૂત સ્થિતિ ભારતીય રોકાણકારોને આકર્ષતી રહેશે તે નક્કી છે.