દુબઈ: વિશ્વના સૌથી વ્યસ્ત હવાઈ મથકોમાંના એક એવા દુબઈ ઇન્ટરનેશનલ એરપોર્ટ (DXB) પરથી મુસાફરો માટે રાહત અને ચેતવણી એમ બંને સમાચાર સામે આવ્યા છે. 7 માર્ચથી એરપોર્ટ પર કામગીરી આંશિક રીતે પુનઃસ્થાપિત કરવામાં આવી છે, પરંતુ પરિસ્થિતિ હજુ પણ સંપૂર્ણપણે સામાન્ય થઈ નથી. એરપોર્ટ સત્તાવાળાઓએ મુસાફરોને સ્પષ્ટ શબ્દોમાં ચેતવણી આપી છે કે, "તમારી એરલાઇન સાથે વાત કર્યા વિના એરપોર્ટ પર આવવાની તસ્દી લેવી નહીં."
બે એરપોર્ટ પરથી મર્યાદિત સેવાઓ
દુબઈ એરપોર્ટ ઓપરેટરે સોશિયલ મીડિયા પ્લેટફોર્મ 'X' પર અપડેટ આપતા જણાવ્યું હતું કે, દુબઈ ઇન્ટરનેશનલ (DXB) અને અલ મક્તૌમ ઇન્ટરનેશનલ એરપોર્ટ (DWC) એમ બંને સ્થાનો પરથી કેટલીક ફ્લાઇટ્સનું સંચાલન શરૂ કરી દેવામાં આવ્યું છે. જોકે, અગાઉના વિક્ષેપોને કારણે ફ્લાઇટના સમયપત્રકમાં સતત ફેરફારો થઈ રહ્યા છે, જેના કારણે મુસાફરોએ સાવધ રહેવું જરૂરી છે.
ભારે ભીડ ટાળવા માટે કડક નિયમો
એરપોર્ટ સત્તાવાળાઓએ વિનંતી કરી છે કે જ્યાં સુધી તમારી એરલાઇન દ્વારા તમારી ફ્લાઇટ 'કન્ફર્મ' હોવાનો સંદેશ ન મળે, ત્યાં સુધી એરપોર્ટ પર મુસાફરી ન કરવી. અગાઉ સુરક્ષાના કારણોસર કામગીરી અસ્થાયી રૂપે સ્થગિત કરવામાં આવી હતી, જેના કારણે હજારો મુસાફરો ફસાયા હતા. હવે જ્યારે સેવાઓ ધીમે ધીમે પાટા પર આવી રહી છે, ત્યારે એરપોર્ટ પર બિનજરૂરી ભીડ ટાળવા માટે આ કડક સૂચના આપવામાં આવી છે.
મુસાફરો માટે મહત્વની સલાહ
અમીરાત સહિતની મોટી એરલાઇન્સે પણ જણાવ્યું છે કે તેઓ પરિસ્થિતિનું સતત મૂલ્યાંકન કરી રહ્યા છે. મુસાફરોને સલાહ આપવામાં આવી છે કે તેઓ એરપોર્ટ રવાના થતા પહેલા એરલાઇનની સત્તાવાર વેબસાઇટ અથવા મોબાઇલ એપ દ્વારા ફ્લાઇટનું લેટેસ્ટ સ્ટેટસ અને સીટની ઉપલબ્ધતા ચોક્કસથી તપાસી લે.
દુબઈ એરપોર્ટ ફરી એકવાર તેની પૂર્ણ ક્ષમતા સાથે કાર્યરત થવા માટે પ્રયત્નશીલ છે, પરંતુ હાલના તબક્કે મુસાફરોની ધીરજ અને સાવચેતી જ શ્રેષ્ઠ ઉપાય છે.