દોહા: પશ્ચિમ એશિયામાં સર્જાયેલી ગંભીર કટોકટી અને કતારના એરસ્પેસ (હવાઈ ક્ષેત્ર) પરના પ્રતિબંધો વચ્ચે કતાર એરવેઝે માનવતાવાદી પગલું ભર્યું છે. એરલાઇને 7 માર્ચથી દોહાના હમાદ ઇન્ટરનેશનલ એરપોર્ટ પરથી યુરોપના પસંદગીના શહેરો માટે ખાસ 'રિપેટ્રિએશન' (વતન પરત લાવવાની) ફ્લાઇટ્સ ચલાવવાની જાહેરાત કરી છે. જોકે, સામાન્ય કોમર્શિયલ ફ્લાઇટ્સ હજુ પણ સ્થગિત જ રહેશે.
સલામત કોરિડોર દ્વારા યુરોપની ઉડાન
કતાર સિવિલ એવિએશન ઓથોરિટી પાસેથી મળેલી વિશેષ મંજૂરી બાદ, એરલાઇને લંડન (LHR), પેરિસ (CDG), મેડ્રિડ (MAD), રોમ (FCO) અને ફ્રેન્કફર્ટ (FRA) માટે સલામત ઓપરેટિંગ કોરિડોર તૈયાર કર્યા છે. આ ખાસ ફ્લાઇટ્સનો હેતુ એવા મુસાફરોને મદદ કરવાનો છે જેઓ એરસ્પેસ બંધ થવાને કારણે દિવસોથી દોહામાં ફસાયેલા છે.
કોને મળશે પેસેન્જર લિસ્ટમાં સ્થાન?
એરલાઇને સ્પષ્ટ કર્યું છે કે આ ફ્લાઇટ્સમાં બેઠકો મર્યાદિત છે, તેથી પ્રાથમિકતાના આધારે ટિકિટ ફાળવવામાં આવશે.
•    પરિવાર સાથે મુસાફરી કરતા ફસાયેલા મુસાફરો.
•    વૃદ્ધો અને બાળકો.
•    તાત્કાલિક તબીબી સારવારની જરૂર હોય તેવા દર્દીઓ.
મુસાફરોને સૂચના આપવામાં આવી છે કે જ્યાં સુધી એરલાઇન તરફથી વ્યક્તિગત રીતે ઈમેલ કે મેસેજ ન મળે, ત્યાં સુધી એરપોર્ટ પર ધસારો ન કરવો.
ટિકિટ કેન્સલેશન અને રિફંડમાં મોટી છૂટ
વર્તમાન અસ્થિર પરિસ્થિતિને જોતા, કતાર એરવેઝે મુસાફરોને મોટી રાહત આપી છે. ૨૮ ફેબ્રુઆરીથી ૧૫ માર્ચ, ૨૦૨૬ વચ્ચેનું કન્ફર્મ બુકિંગ ધરાવતા મુસાફરો કોઈપણ વધારાના ચાર્જ વગર આગામી ૧૪ દિવસની અંદર તેમની મુસાફરીની તારીખ બદલી શકે છે અથવા તેમની ટિકિટનું પૂરેપૂરું રિફંડ મેળવી શકે છે.
આગામી અપડેટ ક્યારે?
કતાર એરવેઝની ટીમો વધારાની રાહત ફ્લાઇટ્સ માટે ચોવીસ કલાક કામ કરી રહી છે. સંપૂર્ણ કામગીરી ક્યારે શરૂ થશે તે અંગેનો મોટો નિર્ણય 8 માર્ચે દોહાના સમય મુજબ સવારે 09:00 વાગ્યે લેવામાં આવશે. મુસાફરોને વિનંતી છે કે તેઓ લેટેસ્ટ માહિતી માટે એરલાઇનની મોબાઈલ એપ પર નજર રાખે.