ઇસ્લામાબાદ: પાકિસ્તાનના રાજકારણમાં ફરી એકવાર ભૂકંપ આવ્યો છે. ૯ મે, ૨૦૨૩ ના રોજ થયેલી હિંસક ઘટનાઓના સંદર્ભમાં પાકિસ્તાનની આતંકવાદ વિરોધી અદાલતે (ATC) પૂર્વ વડાપ્રધાન ઇમરાન ખાનની પાર્ટી 'પાકિસ્તાન તહરીક-એ-ઇન્સાફ' (PTI) ના ૪૭ નેતાઓ અને કાર્યકરોને ૧૦-૧૦ વર્ષની સખત જેલની સજા ફટકારી છે. આ ચુકાદો રાવલપિંડીમાં ન્યાયાધીશ અમજદ અલી શાહ દ્વારા આપવામાં આવ્યો છે.
શું હતો સમગ્ર મામલો?
૯ મે, ૨૦૨૩ ના રોજ જ્યારે ઇસ્લામાબાદ હાઈકોર્ટના પરિસરમાંથી ઇમરાન ખાનની ધરપકડ કરવામાં આવી હતી, ત્યારે સમગ્ર પાકિસ્તાનમાં હિંસક દેખાવો ફાટી નીકળ્યા હતા. આ દરમિયાન પ્રદર્શનકારીઓએ રાવલપિંડીમાં આવેલા પાકિસ્તાની આર્મીના હેડક્વાર્ટર (GHQ) પર હુમલો કરી તોડફોડ કરી હતી અને સરકારી મિલકતોને ભારે નુકસાન પહોંચાડ્યું હતું. આ ઘટનાને પાકિસ્તાની સેનાએ 'કાળા દિવસ' તરીકે ગણાવી હતી.
કોર્ટનું કડક વલણ: મિલકતો થશે જપ્ત
અદાલતે આ કેસમાં ૪૭ આરોપીઓને દોષિત જાહેર કર્યા છે. મહત્વની વાત એ છે કે, ઘણા આરોપીઓ કોર્ટમાં હાજર ન રહેતા તેમને 'જાહેર ગુનેગાર' જાહેર કરવામાં આવ્યા હતા અને તેમની ગેરહાજરીમાં જ આ સજા સંભળાવવામાં આવી છે. જેલની સજાની સાથે દરેક દોષિતને ૫ લાખ પાકિસ્તાની રૂપિયાનો દંડ પણ ફટકારવામાં આવ્યો છે. એટલું જ નહીં, કોર્ટે તમામ દોષિતોની સ્થાવર અને જંગમ મિલકતો જપ્ત કરવાનો પણ હુકમ કર્યો છે.
બલુચિસ્તાનમાં સેનાનું ઓપરેશન: ૧૫ આતંકવાદીઓ ઠાર
એક તરફ રાજકીય અસ્થિરતા વચ્ચે પાકિસ્તાની સેનાએ બલુચિસ્તાનમાં મોટી કાર્યવાહી કરી છે. સુરક્ષા દળોએ હરનાઈ અને બાસીમા વિસ્તારમાં ગુપ્ત માહિતીના આધારે કરેલા બે અલગ-અલગ ઓપરેશનમાં કુલ ૧૫ આતંકવાદીઓને ઠાર માર્યા છે. સેનાએ માર્યા ગયેલા આતંકવાદીઓ પાસેથી મોટા પ્રમાણમાં હથિયારો અને વિસ્ફોટકો કબજે કર્યા છે.