નવી દિલ્હી: ભારતીય ઉડ્ડયન ક્ષેત્રે આજે એક સુવર્ણ પ્રકરણ લખાયું છે. દેશની અગ્રણી એરલાઇન ઇન્ડિગો (IndiGo) એ આંતરરાષ્ટ્રીય મહિલા દિવસની પૂર્વ સંધ્યાએ જાહેરાત કરી છે કે તેના કાર્યબળમાં હવે ૧,૦૦૦ થી વધુ મહિલા પાઇલટ્સ સામેલ છે. આ આંકડો હાંસલ કરનારી ઇન્ડિગો ભારતની પ્રથમ અને વિશ્વની ગણીગાંઠી એરલાઇન્સમાંની એક બની ગઈ છે. આ સિદ્ધિ દર્શાવે છે કે આકાશમાં હવે મહિલાઓનું વર્ચસ્વ ઝડપથી વધી રહ્યું છે.

વૈશ્વિક સ્તર પર ભારત મોખરે

આશ્ચર્યજનક બાબત એ છે કે ઇન્ડિગોના કુલ પાઇલટ્સમાં મહિલાઓનો હિસ્સો ૧૭.૫ ટકા છે, જે વૈશ્વિક સરેરાશ (માત્ર ૫ ટકા) કરતા ત્રણ ગણો વધારે છે. એરલાઇનના કુલ સ્ટાફમાં પણ લગભગ ૪૫ ટકા મહિલાઓ છે, જે સાબિત કરે છે કે એરલાઇન ઉદ્યોગ હવે માત્ર પુરુષોનો જ ગઢ રહ્યો નથી.

માત્ર ઉડાન જ નહીં, સંચાલનમાં પણ સમાન હિસ્સો

ઇન્ડિગોમાં મહિલાઓની ભૂમિકા માત્ર વિમાન ઉડાડવા પૂરતી સીમિત નથી. એરપોર્ટ ઓપરેશનમાં ૩૦ ટકા, નાણા વિભાગમાં ૨૦ ટકા અને ડિજિટલ ટીમમાં ૧૫ ટકા મહિલાઓ પોતાની સેવા આપી રહી છે. સૌથી મહત્વની વાત એ છે કે, કંપનીના નેતૃત્વના પદો (Leadership roles) પર પણ ૨૩ ટકા મહિલાઓ બિરાજમાન છે. 'એમ્બ્રેસ' અને 'ટેક ઓફ ૨.૦' જેવા ખાસ કાર્યક્રમો દ્વારા ઇન્ડિગો એવી મહિલાઓને ફરીથી કામ પર જોડાવાની તક આપે છે જેમણે અંગત કારણોસર નોકરી છોડવી પડી હતી.

'૬E ગર્લ પાવર' અને નવો ઉત્સાહ

ઇન્ડિગોએ આ ખાસ પ્રસંગે એક વીડિયો ફિલ્મ પણ રિલીઝ કરી છે, જેમાં મહિલા કર્મચારીઓની સંઘર્ષ અને સફળતાની વાર્તા દર્શાવવામાં આવી છે. ઇન્ડિગોના ગ્રુપ ચીફ હ્યુમન રિસોર્સિસ ઓફિસર સુખજીત સિંહ પસરિચાએ જણાવ્યું હતું કે, "અમને ગર્વ છે કે અમારી પાસે વિશ્વમાં સૌથી વધુ મહિલા પાઇલટ્સ છે. અમે પ્રતિભાશાળી મહિલાઓને ઉડ્ડયન ક્ષેત્રે ઉજ્જવળ ભવિષ્ય આપવા માટે પ્રતિબદ્ધ છીએ."

આ સાથે જ ભારતે ફરી એકવાર સાબિત કર્યું છે કે વિજ્ઞાન, ટેકનોલોજી અને સાહસના ક્ષેત્રમાં દેશની દીકરીઓ કોઈનાથી પાછળ નથી.