નવી દિલ્હી: ઉત્તર ભારત સહિત સમગ્ર દેશમાં હવામાનનો મિજાજ અચાનક બદલાઈ ગયો છે. માર્ચની શરૂઆતમાં જ સૂર્યનારાયણ આકરા પાણીએ હોય તેમ ગરમીએ મે અને જૂન મહિનાની યાદ અપાવી દીધી છે. ભારતીય હવામાન વિભાગ (IMD) ના તાજેતરના અહેવાલ મુજબ, ઉત્તર ભારતના રાજ્યોમાં તાપમાનમાં અસાધારણ ઉછાળો જોવા મળ્યો છે. સૌથી ચોંકાવનારી સ્થિતિ પહાડી રાજ્યોમાં છે, જ્યાં તાપમાન સામાન્ય કરતા ૮ થી ૧૨ ડિગ્રી સેલ્સિયસ વધુ નોંધાઈ રહ્યું છે.

પહાડોમાં ગરમીનો તોફાની વધારો

સામાન્ય રીતે માર્ચમાં પહાડોનું વાતાવરણ આહલાદક હોય છે, પરંતુ આ વખતે કાશ્મીર અને હિમાચલ પ્રદેશમાં ગરમીએ રેકોર્ડ તોડ્યા છે. તાપમાનમાં આટલો મોટો વધારો હિમનદીઓ (Glaciers) પર દબાણ વધારી શકે છે, જે ચિંતાનો વિષય છે. મેદાની વિસ્તારોમાં પણ પારો સામાન્ય કરતા ૬ થી ૮ ડિગ્રી વધુ રહેતા જનજીવન પ્રભાવિત થયું છે.

હીટવેવની ચેતવણી અને દરિયાકાંઠાની સ્થિતિ

હવામાન વિભાગે ૯ માર્ચ સુધી હીટવેવની ચેતવણી જારી કરી છે. ખાસ કરીને ૭ અને ૮ માર્ચે હિમાચલ પ્રદેશ અને વિદર્ભના કેટલાક ભાગોમાં લૂ ફૂંકાવાની શક્યતા છે. રાજસ્થાનમાં ૧૦ અને ૧૧ માર્ચે આકરી ગરમીનો અનુભવ થશે. બીજી તરફ, ગુજરાત, સૌરાષ્ટ્ર અને કચ્છના દરિયાકાંઠાના વિસ્તારોમાં ગરમીની સાથે ભેજનું પ્રમાણ (Humidity) વધુ રહેતા મુસાફરો અને સ્થાનિક લોકો માટે અસ્વસ્થતા વધશે.

વરસાદ અને હિમવર્ષા લાવશે રાહત

આ સખત ગરમી વચ્ચે એક રાહતના સમાચાર પણ છે. હિમાલય ક્ષેત્રમાં એક નવું વેસ્ટર્ન ડિસ્ટર્બન્સ (Western Disturbance) સક્રિય થવા જઈ રહ્યું છે. જેની અસર ૯ થી ૧૧ માર્ચ દરમિયાન જોવા મળશે. આ દરમિયાન જમ્મુ-કાશ્મીર, હિમાચલ અને ઉત્તરાખંડના ભાગોમાં હળવો વરસાદ અને હિમવર્ષા થઈ શકે છે, જેના કારણે તાપમાનમાં ૫ થી ૭ ડિગ્રીનો ઘટાડો થવાની સંભાવના છે.

પૂર્વ અને દક્ષિણ ભારતનું અપડેટ

બિહાર, ઝારખંડ અને પશ્ચિમ બંગાળમાં આગામી ત્રણ દિવસ સુધી હવામાન સ્થિર રહેશે, પરંતુ તે પછી ત્યાં પણ પારો વધશે. જ્યારે ઓડિશા અને ઉત્તર-પૂર્વના રાજ્યોમાં ૯ થી ૧૩ માર્ચ દરમિયાન હળવો વરસાદ અને વાવાઝોડાની શક્યતા વર્તાઈ રહી છે.