પટના : બિહારના રાજકારણમાં અત્યારે જાણે કોઈ મોટો ભૂકંપ આવ્યો હોય તેવી સ્થિતિ સર્જાઈ છે. જેડીયુના વરિષ્ઠ નેતા અને હરનોટના દસ વખતના ધારાસભ્ય હરિનારાયણ સિંહે દાવો કર્યો છે કે મુખ્યમંત્રી નીતિશ કુમારના પુત્ર નિશાંત કુમાર હવે સક્રિય રાજકારણમાં પદાર્પણ કરવા જઈ રહ્યા છે. હરિનારાયણ સિંહના જણાવ્યા અનુસાર, 8 માર્ચે નિશાંત કુમાર વિધિવત રીતે જેડીયુમાં જોડાશે. આ સમાચાર વાયુવેગે પ્રસરતા જ વિપક્ષ અને સત્તાધારી ગઠબંધનમાં ચર્ચાઓનું બજાર ગરમ થઈ ગયું છે, કારણ કે અત્યાર સુધી નિશાંત કુમાર લાઈમલાઈટ અને રાજકારણથી સંપૂર્ણપણે દૂર રહ્યા છે.

ધારાસભ્યના દાવા મુજબ, આ કોઈ અચાનક લેવાયેલો નિર્ણય નથી પરંતુ એક સુનિયોજિત રોડમેપ છે. તાજેતરમાં મુખ્યમંત્રીના નિવાસસ્થાને મળેલી ઉચ્ચ સ્તરીય બેઠકમાં નિશાંત કુમારના રાજકીય ભવિષ્ય પર મહોર મારવામાં આવી છે. આ પ્લાન મુજબ, એપ્રિલ મહિનામાં યોજાનારી વિધાન પરિષદ (MLC) ની ચૂંટણીમાં નિશાંત કુમારને સભ્ય બનાવવામાં આવશે અને ત્યારબાદ તેમને બિહારના નાયબ મુખ્યમંત્રી તરીકેની મોટી જવાબદારી સોંપવામાં આવી શકે છે. હરિનારાયણ સિંહે તો ત્યાં સુધી કહી દીધું કે 10 એપ્રિલ બાદ નીતિશ કુમાર મુખ્યમંત્રી પદ છોડી શકે છે, જે બિહારના રાજકારણમાં એક યુગના અંત સમાન ગણાશે.

નીતિશ કુમાર હંમેશા લાલુ પ્રસાદ યાદવના પરિવારવાદ પર પ્રહારો કરતા રહ્યા છે, ત્યારે જો તેમના પુત્રની એન્ટ્રી થાય છે તો રાજકીય સમીકરણો સંપૂર્ણ બદલાઈ જશે. નિશાંત કુમાર અત્યાર સુધી ગૌણ ભૂમિકામાં રહ્યા છે અને તેમની છબી એક સાદગી પસંદ વ્યક્તિ તરીકેની છે. હવે જોવાનું એ રહેશે કે જેડીયુના અન્ય દિગ્ગજ નેતાઓ આ 'ઉત્તરાધિકારી' મોડેલને કેવી રીતે સ્વીકારે છે. જોકે, હજુ સુધી જેડીયુના સત્તાવાર પ્રવક્તા કે મુખ્યમંત્રી કાર્યાલય તરફથી આ અંગે કોઈ સત્તાવાર પુષ્ટિ કરવામાં આવી નથી, પરંતુ હરિનારાયણ સિંહના નિવેદને રાજકીય ગરમાવો ચરમસીમાએ પહોંચાડી દીધો છે.