નવી દિલ્હી:છેલ્લા કેટલાક સમયથી ચર્ચામાં રહેલી અને વિવાદોના વંટોળ વચ્ચે સિનેમાઘરોમાં પહોંચેલી ફિલ્મ 'ધ કેરળ સ્ટોરી ૨' ને લઈને હવે રાજકીય નિવેદનબાજી તેજ થઈ છે. કોંગ્રેસ નેતા અને લોકસભામાં વિરોધ પક્ષના નેતા રાહુલ ગાંધીએ આ ફિલ્મ પર કટાક્ષ કરતા જણાવ્યું છે કે પ્રેક્ષકો હવે આવી ફિલ્મોને નકારી રહ્યા છે. કેરળની મુલાકાતે આવેલા રાહુલે ફિલ્મના કલેક્શન અને લોકોના પ્રતિસાદ પર સવાલો ઉઠાવ્યા છે.
રાહુલ ગાંધીએ પોતાના નિવેદનમાં જણાવ્યું હતું કે, "લોકો આ ફિલ્મ જોઈ રહ્યા નથી અને થિયેટરો ખાલી જોવા મળી રહ્યા છે. કેરળની જનતા અને દેશના પ્રેક્ષકો હવે ઘણા સમજદાર છે. તેઓ જાણે છે કે કેરળની સાચી સંસ્કૃતિ શું છે અને ફિલ્મો દ્વારા કેવા પ્રકારનો એજન્ડા ચલાવવામાં આવે છે." તેમણે વધુમાં ઉમેર્યું કે હવે લોકો ધિક્કાર કે વિભાજનની વાત કરતી સામગ્રીમાં રસ ધરાવતા નથી.
અત્રે ઉલ્લેખનીય છે કે 'ધ કેરળ સ્ટોરી ૨' ને રિલીઝ પહેલા ભારે વિરોધનો સામનો કરવો પડ્યો હતો. કેરળ હાઈકોર્ટના હસ્તક્ષેપ અને લાંબી કાયદાકીય લડત બાદ તેને રિલીઝની પરવાનગી મળી હતી. અગાઉ કેરળના મુખ્યમંત્રી પી. વિજયને પણ આ ફિલ્મને રાજ્યની છબી ખરાબ કરવા માટેનો એક 'પ્રોપગેન્ડા' ગણાવ્યો હતો. ફિલ્મમાં દર્શાવવામાં આવેલા તથ્યો અને વાર્તાને લઈને સતત વિવાદ ચાલી રહ્યો છે.
 રાહુલ ગાંધીના આ નિવેદન બાદ સોશિયલ મીડિયા પર પણ પ્રતિક્રિયાઓનો ધોધ વછૂટ્યો છે. ફિલ્મના સમર્થકો તેને સત્ય ઘટના ગણાવી રહ્યા છે, જ્યારે વિરોધ કરનારાઓ તેને સમાજમાં તિરાડ પાડવાનો પ્રયાસ માની રહ્યા છે. બોક્સ ઓફિસના આંકડાઓ ભલે ગમે તે કહે, પણ રાહુલ ગાંધીના આ નિવેદને ફિલ્મને ફરી એકવાર હેડલાઇન્સમાં લાવી દીધી છે