અમદાવાદ  ભારતીય શેરબજારમાં આગામી સપ્તાહ આઈપીઓ (IPO) રોકાણકારો માટે એક્શનથી ભરપૂર રહેવાનું છે. 9 માર્ચથી શરૂ થતા અઠવાડિયામાં કુલ ચાર નવા પબ્લિક ઈશ્યૂ સબસ્ક્રિપ્શન માટે ખુલશે, જેમાંથી ત્રણ મેઈનબોર્ડ સેગમેન્ટના છે. આ યાદીમાં સૌથી મોટું આકર્ષણ ₹6,000 કરોડનો 'રાજમાર્ગ ઈન્ફ્રા ઈન્વેસ્ટમેન્ટ ટ્રસ્ટ'નો ઈશ્યૂ છે, જે 11 માર્ચે ખુલશે. આ ઉપરાંત, મેઈનબોર્ડમાં રાજપૂતાના સ્ટેનલેસ (₹254.98 કરોડ) અને ઈનોવેશન લિમિટેડ (₹322.84 કરોડ) ના આઈપીઓ પણ રોકાણકારોને આકર્ષવા તૈયાર છે. જે લોકો SME સેગમેન્ટમાં નસીબ અજમાવવા માંગતા હોય તેમના માટે એપ્સિસ એરોકોમનો આઈપીઓ પણ 11 માર્ચે મેદાનમાં ઉતરશે.

નવા આઈપીઓ સિવાય, જે કંપનીઓ પહેલેથી જ ખુલી ગઈ છે તેમાં પણ રોકાણ કરવાની છેલ્લી તક રહેશે. એલ્ફિન એગ્રો ઈન્ડિયાનો આઈપીઓ 9 માર્ચે બંધ થઈ રહ્યો છે, જે અત્યાર સુધીમાં સંપૂર્ણ ભરાઈ ગયો છે. જ્યારે શ્રીનિભાસ પ્રધાન કન્સ્ટ્રક્શન્સમાં 10 માર્ચ સુધી બોલી લગાવી શકાશે. રોકાણકારો માટે સૌથી મોટા સમાચાર ફિનટેક યુનિકોર્ન 'મનીવ્યૂ' તરફથી આવી રહ્યા છે, જે ₹1,500 કરોડનો મોટો ઈશ્યૂ લાવવાની તૈયારી કરી રહ્યું છે. બજારના નિષ્ણાતો માને છે કે લિક્વિડિટી વધતા અને પોઝિટિવ સેન્ટિમેન્ટને કારણે આ તમામ ઈશ્યૂને સારો પ્રતિસાદ મળી શકે છે.

લિસ્ટીંગની વાત કરીએ તો, આગામી અઠવાડિયે ચાર કંપનીઓ શેરબજારમાં પોતાનું ડેબ્યૂ કરશે. એસીટેક ઈ-કોમર્સ 9 માર્ચે લિસ્ટ થઈને અઠવાડિયાની શરૂઆત કરશે. જોકે, રોકાણકારોની નજર 11 માર્ચે લિસ્ટ થનારા 'SEDEMAC Mechatronics' પર રહેશે, જે મેઈનબોર્ડ સેગમેન્ટમાં મોટું લિસ્ટિંગ માનવામાં આવે છે. ત્યારપછીના દિવસોમાં એલ્ફિન એગ્રો અને શ્રીનિભાસ પ્રધાનના શેર પણ બજારમાં ટ્રેડિંગ માટે ઉપલબ્ધ થશે. જો તમે પણ આઈપીઓ દ્વારા કમાણી કરવા માંગતા હોવ, તો પ્રાઈસ બેન્ડ અને કંપનીના ફંડામેન્ટલ્સ ચકાસીને 9 માર્ચથી તમારી બિડ તૈયાર રાખવી હિતાવહ છે.