હૈદરાબાદ: સાઉથ સિનેમાના પાવર કપલ વિજય દેવેરાકોંડા અને રશ્મિકા મંદાના અત્યારે માત્ર પોતાના લગ્નને કારણે જ નહીં, પરંતુ તેમની ઉદારતાને કારણે પણ ચર્ચામાં છે. તાજેતરમાં જ લગ્નના બંધનમાં બંધાયેલા આ સ્ટાર કપલે તેલંગાણાની ૪૪ સરકારી શાળાઓ માટે એક એવી જાહેરાત કરી છે, જેણે આખા દેશમાં પ્રશંસા મેળવી છે. લગ્ન બાદ હનીમૂન પર જવાને બદલે આ જોડીએ સમાજસેવાનો માર્ગ પસંદ કરીને એક નવો દાખલો બેસાડ્યો છે.
 ઉદયપુરમાં ભવ્ય લગ્ન વિધિ સંપન્ન કર્યા બાદ, વિજય અને રશ્મિકાએ નાગરકુર્નૂલ જિલ્લાના અચમ્પેટમાં આવેલા વિજયના પૈતૃક ગામની મુલાકાત લીધી હતી. અહીં ગ્રામજનો સાથે મુલાકાત દરમિયાન વિજયે જાહેર કર્યું કે તેમના 'દેવેરાકોંડા ચેરિટેબલ ટ્રસ્ટ' દ્વારા વિસ્તારની ૪૪ સરકારી શાળાઓના ધોરણ ૯ અને ૧૦ના વિદ્યાર્થીઓને શિષ્યવૃત્તિ આપવામાં આવશે. આ જાહેરાત થતા જ હાજર રહેલા ગ્રામજનોએ તાળીઓના ગડગડાટ સાથે આ નિર્ણયને વધાવ્યો હતો.
વિજયે તેલુગુમાં વાતચીત કરતા જણાવ્યું કે, આ પહેલનો મુખ્ય હેતુ એવા પ્રતિભાશાળી વિદ્યાર્થીઓને મદદ કરવાનો છે જેઓ આર્થિક સંકડામણને કારણે અભ્યાસ છોડી દે છે. ખાસ કરીને બોર્ડની પરીક્ષાની તૈયારી કરી રહેલા કિશોરો માટે આ શિષ્યવૃત્તિ આશીર્વાદ સમાન સાબિત થશે. લગ્ન બાદ વિજયના ઘરે સત્યનારાયણ વ્રતની પૂજા કરી નવદંપતીએ સીધા જ લોકસેવાના કાર્યમાં ઝંપલાવ્યું છે.
ગામની મુલાકાત વખતે રશ્મિકા ક્રીમ કલરની કાંજીવરમ સાડીમાં અત્યંત સુંદર દેખાતી હતી, જ્યારે વિજયે એકદમ સાદો લુક પસંદ કર્યો હતો. બંનેની જોડી રિયલ લાઈફમાં જેટલી હિટ છે, એટલી જ જલ્દી રીલ લાઈફમાં પણ જોવા મળશે. આ જોડી આગામી ૧૧ સપ્ટેમ્બરના રોજ રિલીઝ થનારી ફિલ્મ 'રાણાબલી' માં સાથે સ્ક્રીન શેર કરતી જોવા મળશે. લગ્નનો આનંદ અન્યની મદદ કરીને ઉજવવાની આ રીત ખરેખર અનુકરણીય છે