વોશિંગ્ટન: અમેરિકા અને ઈરાન વચ્ચે ચાલી રહેલા ભીષણ સૈન્ય સંઘર્ષ વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે મોટો દાવો કર્યો છે કે અમેરિકી દળોએ ઈરાનની નૌકાદળ (નેવી) નો સંપૂર્ણ સફાયો કરી નાખ્યો છે અને હવે ઈરાનની નેવી સમુદ્રના તળિયે ગરકાવ થઈ ગઈ છે. પત્રકારો સાથેની વાતચીતમાં ટ્રમ્પે રશિયા-ઈરાનના સંબંધો, હોર્મુઝની સામુદ્રધુનીમાંથી પસાર થતા વેપાર, ક્રૂડ ઓઇલના વૈશ્વિક ભાવો અને ભારતને રશિયન ઓઇલ ખરીદવાની અપાયેલી મંજૂરી જેવા અનેક વૈશ્વિક મુદ્દાઓ પર ખુલીને જવાબો આપ્યા હતા.

જ્યારે એક પત્રકારે રાષ્ટ્રપતિ ટ્રમ્પને પૂછ્યું કે શું રશિયા ઈરાનને ગુપ્તચર માહિતી અને ટાર્ગેટિંગ ડેટા પૂરા પાડીને મદદ કરી રહ્યું છે? ત્યારે ટ્રમ્પે સ્પષ્ટ શબ્દોમાં જણાવ્યું કે, "મને આવો કોઈ જ સંકેત મળ્યો નથી. જો તેઓ (રશિયા) આવું કરી પણ રહ્યા હોય, તો તેઓ બહુ સારું કામ નથી કરી રહ્યા કારણ કે ઈરાનની સ્થિતિ અત્યારે બિલકુલ સારી નથી."

હોર્મુઝની સામુદ્રધુનીમાંથી પસાર થતા જહાજો પરના જોખમ અને અટકી પડેલા ટ્રાફિક વિશે પૂછવામાં આવતા ટ્રમ્પે કહ્યું કે, "ત્યાંથી પસાર થવું કે નહીં તે જહાજોની પોતાની પસંદગી છે, પરંતુ અમે તે વિસ્તાર સાફ કરી નાખ્યો છે. અમે તેમની (ઈરાનની) નેવીનો સફાયો કરી દીધો છે. તેમની નેવી હવે સમુદ્રના તળિયે છે. આ એક લશ્કરી અભિયાન છે. અમને અંદાજ હતો કે ઓઇલના ભાવ વધશે, જે વધશે. પણ તે નીચે પણ આવશે. તે ખૂબ જ ઝડપથી નીચે આવશે. અને અમે પૃથ્વીના નકશા પરથી એક મોટા કેન્સરને દૂર કરી દીધું હશે. ૭મી ઓક્ટોબરને ભૂલશો નહીં. વર્ષોથી બનેલી તમામ ઘટનાઓને ભૂલશો નહીં, આ બધું આ લોકો દ્વારા જ કરવામાં આવ્યું છે. તેથી અમે જે કરી રહ્યા છીએ તે એક મહાન કાર્ય છે, માત્ર આપણા દેશ કે ઇઝરાયેલ માટે જ નહીં, પરંતુ સમગ્ર વિશ્વ અને મધ્ય પૂર્વ માટે."

અમેરિકાના ટ્રેઝરી સેક્રેટરી સ્કોટ બેસેન્ટ દ્વારા ભારતને અમુક અંશે રશિયન ક્રૂડ ઓઇલ ખરીદવાની અસ્થાયી છૂટ આપવાના નિર્ણય અંગે પત્રકારે પૂછ્યું કે શું સ્ટ્રેટેજિક પેટ્રોલિયમ રિઝર્વ (એસપીઆર) નો ઉપયોગ કરવા જેવા અન્ય કોઈ પગલાં પર વિચાર થઈ રહ્યો છે? ત્યારે ટ્રમ્પે કહ્યું કે, "જો એવા કોઈ પગલાં હોય, તો હું દબાણ થોડું ઓછું કરવા માટે તે ચોક્કસ કરીશ. પરંતુ મને લાગે છે કે ઓઇલનું દબાણ ભલે હોય, આપણી પાસે પુષ્કળ ઓઇલ છે. આપણા દેશ પાસે તેનો વિશાળ ભંડાર છે, અને બહાર પણ ઘણું ઓઇલ છે. આ સ્થિતિ ખૂબ જ ઝડપથી સુધરી જશે."

આંતરરાષ્ટ્રીય મીડિયા અને ડિજિટલ ચેનલોના સત્તાવાર અહેવાલો અનુસાર, અમેરિકા અને ઇઝરાયેલ દ્વારા ઈરાન પર મોટા પાયે સૈન્ય કાર્યવાહી ચાલી રહી છે, જેમાં ઈરાનની ૬૦ ટકા જેટલી મિસાઈલો અને લોન્ચરો નાશ પામ્યા હોવાના અહેવાલો છે. ઉપરાંત, ઈરાનના ૨૪ જેટલા જહાજો અને યુદ્ધજહાજો પર હુમલો કરાયો છે. 

આ સંઘર્ષની સીધી અસર વૈશ્વિક ક્રૂડ બજાર પર પડી છે, જેના પગલે તેલના ભાવોને નિયંત્રણમાં રાખવા અમેરિકાએ ભારત જેવા દેશોને રશિયા પાસેથી ઓઇલ ખરીદવાની આંશિક રાહત આપી છે.