સુરત:મધ્ય પૂર્વમાં ચાલી રહેલો સંઘર્ષ હવે સંપૂર્ણપણે બેકાબૂ બની ચૂક્યો છે અને વિશ્વ એક ભયાનક ત્રીજા વિશ્વયુદ્ધના આરે આવીને ઊભું રહ્યું છે. ઈરાની રાષ્ટ્રપતિ મસૂદ પેઝેશ્કિયને શાંતિની જે આશા જગાડી હતી, તેને તેમના જ દેશના કટ્ટરપંથી રિવોલ્યુશનરી ગાર્ડ્સ (IRGC) એ ઠોકર મારીને યુદ્ધની આગમાં ઘી હોમ્યું છે. આક્રમક બનેલા ઈરાની ડ્રોન્સે હવે યુએઈના અલ ધાફરા એર બેઝ, દુબઈ અને કુવૈતમાં અમેરિકન સૈનિકોના રહેણાંક ટાવર્સને સીધા નિશાન બનાવ્યા છે. આ હુમલાઓમાં દુબઈમાં એક નાગરિકના મૃત્યુની પુષ્ટિ થતા સમગ્ર અખાતી દેશોમાં સુરક્ષા માટે રેડ એલર્ટ જાહેર કરી દેવામાં આવ્યું છે.

બીજી તરફ, અમેરિકા અને ઈઝરાયલના સંયુક્ત વળતા હુમલા એટલા પ્રચંડ છે કે તેમાં અત્યાર સુધી 195 થી વધુ વિદ્યાર્થીઓ અને શિક્ષકોએ જીવ ગુમાવ્યા છે, જ્યારે 68 જેટલી શાળાઓ કાટમાળમાં ફેરવાઈ ગઈ છે. તહેરાનના નિલોફર સ્ક્વેર પર થયેલા જીવલેણ હુમલામાં 20 નાગરિકોના મોત બાદ સ્થિતિ વધુ વણસી છે. આ ગંભીર સમયમાં બહેરીનના મીના સલમાન વિસ્તારમાં લાગેલી ભીષણ આગ અને નોર્વેની રાજધાની ઓસ્લોમાં અમેરિકન દૂતાવાસ પાસે થયેલા રહસ્યમય શક્તિશાળી વિસ્ફોટે વિશ્વભરની સુરક્ષા એજન્સીઓની ઊંઘ હરામ કરી દીધી છે.

સંયુક્ત આરબ અમીરાત (UAE) એ હવે સ્પષ્ટ ચીમકી આપી છે કે દેશની સુરક્ષા તેમની 'રેડ લાઈન' છે, જ્યારે કતારના અમીરે અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ સાથે સીધી વાતચીત કરી કડક વલણ અપનાવવાનો સંકેત આપ્યો છે. ઈરાનના રાષ્ટ્રપતિની માફીને 'આત્મસમર્પણ' ગણાવતા ડોનાલ્ડ ટ્રમ્પના નિવેદન બાદ હવે આ જંગ માત્ર ઈરાન અને ઈઝરાયલ વચ્ચેનો નથી રહ્યો, પણ તે વૈશ્વિક સત્તાઓના સીધા સંઘર્ષમાં પરિવર્તિત થઈ રહ્યો છે. આખા વિશ્વની નજર હવે સુરક્ષા પરિષદ અને આ દેશો દ્વારા લેવામાં આવતા આગામી પગલાં પર ટકેલી છે.