અમદાવાદ:મધ્ય-પૂર્વમાં ચાલી રહેલા વિનાશક યુદ્ધ અને ઈરાન દ્વારા હોર્મુઝની ખાડીમાં ટેન્કરોના પરિવહન પર લગાવવામાં આવેલા પ્રતિબંધોને પગલે વૈશ્વિક સ્તરે ઓઈલ અને ગેસની ગંભીર કટોકટી સર્જાઈ છે. આ વૈશ્વિક ઉથલપાથલની વચ્ચે ભારત માટે રાહતના સમાચાર આવ્યા છે. ઓસ્ટ્રેલિયા અને કેનેડા જેવા દેશોએ ભારતને વધારાનો ગેસ પુરવઠો પૂરો પાડવાની તૈયારી દર્શાવી છે, જેથી ભારતમાં ઉર્જા ક્ષેત્રે કોઈ મોટી મુશ્કેલી ન સર્જાય. સરકારી સૂત્રોના જણાવ્યા અનુસાર, ભારતે અગાઉથી જ પોતાની ઉર્જા સુરક્ષા માટે અનેકવિધ સ્ત્રોતો અને માર્ગો તૈયાર રાખ્યા હોવાથી આ યુદ્ધની ભારત પર કોઈ ગંભીર અસર થવાની સંભાવના નહિવત છે.

ભારતની ઉર્જા સુરક્ષાનું આયોજન કેટલું મજબૂત છે તેનો અંદાજ એ વાત પરથી લગાવી શકાય છે કે, છેલ્લા એક દાયકામાં ભારતે ક્રૂડ ઓઈલ માટેના સ્ત્રોત 27 દેશોથી વધારીને 40 દેશો સુધી પહોંચાડ્યા છે. હાલમાં ભારત રશિયા, પશ્ચિમ આફ્રિકા, અમેરિકા અને મધ્ય એશિયા સહિત છ ખંડોમાંથી ઉર્જા સંસાધનોની આયાત કરી રહ્યું છે. નોંધપાત્ર વાત એ છે કે, ભારતની માત્ર 40 ટકા ક્રૂડ ઓઈલની આયાત જ હોર્મુઝની ખાડીમાંથી થાય છે, જ્યારે બાકીની 60 ટકા જરૂરિયાતો અન્ય સુરક્ષિત માર્ગો દ્વારા સંતોષવામાં આવે છે. આમ, એક જ જળમાર્ગ પરની નિર્ભરતા ઘટાડીને ભારતે પોતાની અર્થવ્યવસ્થાને સુરક્ષિત કરી લીધી છે.

સરકારે સ્પષ્ટ કર્યું છે કે મધ્ય-પૂર્વમાં ચાલી રહેલા સંઘર્ષને કારણે ભારતમાં પેટ્રોલ અને ડીઝલની કોઈ અછત સર્જાશે નહીં. યુદ્ધની સ્થિતિમાં ઉર્જા સુરક્ષાને વધુ મજબૂત કરવા માટે ભારત સતત નવા અને વૈકલ્પિક ઉર્જા સ્ત્રોતોની શોધ ચાલુ રાખશે. ભલે ઈરાન અને અન્ય દેશો વચ્ચેનો તણાવ ઉર્જા બજારોને અસ્થિર બનાવી રહ્યો હોય, પરંતુ ભારતની વૈવિધ્યસભર આયાત વ્યૂહરચનાએ તેને આ વૈશ્વિક સંકટ સામે એક મજબૂત કવચ પૂરું પાડ્યું છે. ભારતની આ આક્રમક ઉર્જા કૂટનીતિના કારણે જ આજે દેશના નાગરિકોએ પુરવઠા ખોરવાવાની ચિંતા કરવાની જરૂર નથી.