તેહરાન: મધ્ય પૂર્વમાં ચાલી રહેલા યુદ્ધ વચ્ચે ઈરાનના શાસક વર્ગમાં આંતરિક સંઘર્ષ ચરમસીમાએ પહોંચ્યો છે. રાષ્ટ્રપતિ મસૂદ પેઝેશ્કિયાને પડોશી ગલ્ફ દેશો પર ઈરાની મિસાઈલ અને ડ્રોન હુમલાઓ માટે જાહેરમાં માફી માંગતા રાજકીય ભૂકંપ સર્જાયો છે. પેઝેશ્કિયાને ટેલિવિઝન પરના પોતાના સંબોધનમાં સ્પષ્ટ કર્યું હતું કે જ્યાં સુધી ઈરાન પર કોઈ હુમલો ન થાય ત્યાં સુધી ઈરાન પડોશી દેશોને નિશાન બનાવશે નહીં. જોકે, તેમના આ શાંતિપ્રિય વલણને ઈરાનના શક્તિશાળી રિવોલ્યુશનરી ગાર્ડ્સ (IRGC) અને કટ્ટરપંથી સાંસદોએ સખત ફગાવી દીધું છે અને તેને નબળાઈ ગણાવી છે.

આ માફી બાદ પરિસ્થિતિ વધુ જટિલ બની છે. એક તરફ રાષ્ટ્રપતિના કાર્યાલયે સ્પષ્ટતા કરવી પડી છે કે ઈરાની સૈન્ય અમેરિકન મથકો પરના હુમલા ચાલુ રાખશે, તો બીજી તરફ અમેરિકી રાષ્ટ્રપતિ ડોનાલ્ડ ટ્રમ્પે આ નિવેદનને ઈરાનની 'શરણાગતિ' ગણાવી છે. ટ્રમ્પે ચેતવણી આપી છે કે અમેરિકા તેના હુમલાઓનો વ્યાપ વધારી શકે છે. હકીકતમાં, પેઝેશ્કિયાનના આશ્વાસન છતાં દુબઈ અને અબુ ધાબીમાં ઈરાની હુમલાઓ અટક્યા નથી, જે દર્શાવે છે કે ઈરાનની સૈન્ય પાંખ પર રાજકીય નેતૃત્વનું નિયંત્રણ કેટલું મર્યાદિત છે.

ઈરાનના રાજકીય વર્તુળોમાં આ નિવેદન બાદ આક્રોશ ફેલાયો છે. કટ્ટરપંથી નેતાઓ અને વરિષ્ઠ કમાન્ડરો માને છે કે આવા સમયે માફી માંગવી એ દેશનું મનોબળ તોડવા સમાન છે. ભૂતપૂર્વ કમાન્ડરો અને સાંસદ હમીદ રસાઈ જેવા નેતાઓએ પેઝેશ્કિયાનના વલણને 'અવ્યાવસાયિક અને અસ્વીકાર્ય' ગણાવ્યું છે. ઈરાની રિવોલ્યુશનરી ગાર્ડ્સે તો એક નિવેદન દ્વારા ફરીથી યુદ્ધની રણનીતિ સ્પષ્ટ કરી દીધી છે કે તેઓ અમેરિકા અને 'ઝાયોનિસ્ટ' ઠેકાણાઓને નિશાન બનાવવાનું ચાલુ રાખશે, જે સીધું જ રાષ્ટ્રપતિની નીતિની વિરુદ્ધ જઈ રહ્યું છે.