દિલ્હી: રાજધાની દિલ્હીના ઉત્તમ નગર વિસ્તારમાં હોળી પર્વ દરમિયાન બનેલી એક હૃદયદ્રાવક ઘટના બાદ હવે વહીવટીતંત્ર કડક એક્શન મોડમાં આવી ગયું છે. 26 વર્ષીય યુવકની લિંચિંગની ઘટનાના મુખ્ય આરોપી નિઝામુદ્દીનના ઘર પર આજે દિલ્હી મ્યુનિસિપલ કોર્પોરેશન (MCD)નું બુલડોઝર ગર્જ્યું હતું. અધિકારીઓએ જણાવ્યું હતું કે તપાસ દરમિયાન આ મિલકત ગેરકાયદેસર રીતે બાંધવામાં આવી હોવાનું માલૂમ પડતા તેને તાત્કાલિક અસરથી તોડી પાડવાની કાર્યવાહી હાથ ધરવામાં આવી છે. આ કાર્યવાહી દરમિયાન કાયદો અને વ્યવસ્થા જાળવી રાખવા માટે સમગ્ર વિસ્તારમાં ભારે પોલીસ બંદોબસ્ત ગોઠવી દેવામાં આવ્યો હતો.

આ ઘટનાની શરૂઆત હોળીના દિવસે પાણીના ફુગ્ગા ફેંકવા જેવી સામાન્ય બાબતથી થઈ હતી, પરંતુ થોડી જ વારમાં તે બંને સમુદાયો વચ્ચેના હિંસક સંઘર્ષમાં ફેરવાઈ ગઈ હતી. એક છોકરી દ્વારા પાણીનો ફુગ્ગો ફેંકાયા બાદ શરૂ થયેલો વિવાદ એટલો વકર્યો કે બંને પરિવારો સામસામે આવી ગયા અને રસ્તા પર ભારે પથ્થરમારો તથા મારપીટ થઈ હતી. આ હિંસક ઝઘડામાં કુલ આઠ લોકો ગંભીર રીતે ઈજાગ્રસ્ત થયા હતા, જેમને તાત્કાલિક સારવાર માટે હોસ્પિટલમાં ખસેડવામાં આવ્યા હતા. કમનસીબે, ગંભીર ઈજાઓ પામેલા 26 વર્ષીય યુવકે ગુરુવારે સારવાર દરમિયાન દમ તોડતા વાતાવરણ વધુ તંગ બની ગયું હતું.

યુવકના મૃત્યુ બાદ મામલો હત્યામાં પલટાતા પોલીસે FIRમાં કલમ 103(1)નો ઉમેરો કરીને કાયદાકીય ગાળિયો મજબૂત કર્યો છે. પોલીસે અત્યાર સુધીમાં એક સગીર સહિત કુલ સાત આરોપીઓની ધરપકડ કરી લીધી છે અને અન્ય સંડોવાયેલા લોકોની શોધખોળ ચાલુ છે. વહીવટીતંત્ર દ્વારા આરોપીના ગેરકાયદેસર બાંધકામને તોડી પાડીને એક કડક સંદેશ આપવામાં આવ્યો છે કે કાયદો હાથમાં લેનારાઓને કોઈ પણ સંજોગોમાં છોડવામાં આવશે નહીં. હાલમાં આ વિસ્તારમાં પોલીસની સતત પેટ્રોલિંગ ચાલુ છે અને પરિસ્થિતિ તણાવપૂર્ણ છતાં નિયંત્રણ હેઠળ હોવાનું પોલીસ અધિકારીઓનું કહેવું છે.