તેહરાન: મધ્ય પૂર્વના યુદ્ધમાં આજે એક મોટો વળાંક આવ્યો છે, જ્યારે ઇઝરાયલી વાયુસેનાએ ઈરાનના વ્યૂહાત્મક ગઢ ગણાતા ઇસ્ફહાન પ્રાંત પર ભીષણ હવાઈ હુમલા કર્યા છે. પ્રાપ્ત અહેવાલો મુજબ, યુએસ-ઇઝરાયલી સંયુક્ત ફાઇટર જેટ્સ દ્વારા કરવામાં આવેલી આ કાર્યવાહીમાં ઈરાનની વાયુસેનાને મોટો ફટકો પડ્યો છે. આ હુમલામાં ઈરાનના અત્યંત શક્તિશાળી ગણાતા અનેક F-14 ફાઇટર જેટ્સનો નાશ કરવામાં આવ્યો છે, જે ઈરાની હવાઈ સંરક્ષણ ક્ષમતા માટે એક મોટું નુકસાન છે. તસ્નીમ ન્યૂઝ એજન્સીના અહેવાલ મુજબ, આ હિંસક કાર્યવાહીમાં ઓછામાં ઓછા 11 લોકોએ પોતાનો જીવ ગુમાવ્યો છે.

આ આકાશી હુમલા માત્ર ઇસ્ફહાન એરપોર્ટ પૂરતા સીમિત ન રહેતા, ઇઝરાયલી લડાયક વિમાનોએ ઇસ્ફહાન પ્રાંતના ઓછામાં ઓછા આઠ જેટલા શહેરોને નિશાન બનાવ્યા છે. જેમાં નજફાબાદ, અરન, બિદગોલ, બરખાર, ખોમેની શહેર, શહરઝા, ફલાવર્જન અને મોબારાકેહ જેવા મહત્વના શહેરોનો સમાવેશ થાય છે. હુમલા દરમિયાન માત્ર સૈન્ય એરપોર્ટ જ નહીં, પરંતુ એક મહત્વપૂર્ણ લશ્કરી ઉત્પાદન વર્કશોપ અને એક ઘોડેસવારી ક્લબ પર પણ સચોટ પ્રહારો કરવામાં આવ્યા હતા. આ હુમલાઓની તીવ્રતા એટલી વધારે હતી કે આખું પ્રાંત ધણધણી ઉઠ્યું હતું અને ઈરાની સૈન્યના મહત્વપૂર્ણ માળખાનો મોટો ભાગ ભસ્મીભૂત થઈ ગયો છે.

આ ઘટના બાદ ઈરાની સૈન્ય મથકોમાં ભારે અફરાતફરીનો માહોલ છે. ઈરાની સરહદોની અંદર ઘૂસીને ઇઝરાયલ દ્વારા કરવામાં આવેલી આ પ્રકારની કાર્યવાહીએ મધ્ય પૂર્વમાં સૈન્ય સંતુલન સંપૂર્ણપણે બદલી નાખ્યું છે. ઈરાન આ નુકસાનની ભરપાઈ કેવી રીતે કરશે અને હવે પછીની તેમની રણનીતિ શું હશે, તે અંગે સમગ્ર વિશ્વમાં ચર્ચા જાગી છે. બીજી તરફ, ઇઝરાયલે પોતાના આ ઓપરેશનને ઈરાની આક્રમકતાનો જવાબ ગણાવ્યો છે. હાલમાં ઇસ્ફહાનના અસરગ્રસ્ત વિસ્તારોમાં પોલીસ અને રાહત ટીમો તૈનાત કરવામાં આવી છે, જ્યારે યુદ્ધના વાદળો વધુ ઘેરા બની રહ્યા છે.