બીજિંગ: મધ્ય પૂર્વમાં ભડકેલા યુદ્ધ અને વધતા વૈશ્વિક તણાવ વચ્ચે ચીનના વિદેશ મંત્રી વાંગ યીએ ભારત-ચીન સંબંધોને લઈને એક આશ્ચર્યજનક અને આશાસ્પદ નિવેદન આપ્યું છે. તેમણે કહ્યું કે, "આપણે દુશ્મન નથી, આપણે મિત્રો છીએ." ભારત અને ચીન વચ્ચેના સંબંધોમાં ચાલી રહેલી કડવાશને બાજુ પર મૂકીને તેમણે બંને પડોશી દેશોને એકબીજાના 'હરીફ' નહીં પણ 'ભાગીદાર' તરીકે જોવાની અપીલ કરી છે. તેમણે સ્પષ્ટ કર્યું કે બંને દેશોએ એકબીજાને ખતરો માનવાને બદલે પરસ્પર વિકાસની તક તરીકે સ્વીકારવા જોઈએ, જે એશિયા અને વિશ્વના સ્થિરતા માટે અનિવાર્ય છે.

વાંગ યીએ બંને દેશોના ઊંડા સાંસ્કૃતિક સંબંધો અને 'ગ્લોબલ સાઉથ'ના સભ્યો તરીકેના સહિયારા હિતો પર વિશેષ ભાર મૂક્યો હતો. તેમણે કહ્યું કે, ભારત અને ચીન માત્ર પડોશી જ નથી, પણ વિકાસશીલ દેશોના અવાજ તરીકે વિશ્વ મંચ પર મહત્વપૂર્ણ ભૂમિકા ભજવી રહ્યા છે. આંતરરાષ્ટ્રીય સ્તરે ઉભી થયેલી અસ્થિરતાના માહોલમાં તેમણે બંને દેશો વચ્ચેના સહયોગને મજબૂત બનાવવા માટે પરસ્પર વિશ્વાસ અને આદરની જરૂરિયાત પર ભાર મૂક્યો. ચીનના આ નિવેદનને રાજદ્વારી વર્તુળોમાં ભારત સાથેના સંબંધો સુધારવાની એક મોટી પહેલ તરીકે જોવામાં આવી રહી છે.

વૈશ્વિક અર્થવ્યવસ્થા અને સુરક્ષાના પડકારો વચ્ચે ચીનનું આ વલણ નોંધપાત્ર માનવામાં આવે છે. મધ્ય પૂર્વના યુદ્ધ અને તેલના ભાવમાં વધારો જેવી વૈશ્વિક સમસ્યાઓનો સામનો કરવા માટે ભારત અને ચીનનું સાથે આવવું સમગ્ર વિશ્વ માટે સકારાત્મક સંકેત છે. વિદેશ મંત્રીના આ નિવેદન બાદ હવે એ જોવું રહ્યું કે સરહદી વિવાદો અને વ્યાપારિક મડાગાંઠો વચ્ચે બંને દેશો આ મિત્રતાના સંદેશાને વાસ્તવિકતામાં કેવી રીતે ફેરવે છે. શું ચીનનું આ નિવેદન માત્ર એક રાજદ્વારી રણનીતિ છે કે પછી તે ખરેખર ભારત સાથેના સંબંધોમાં નવો અધ્યાય શરૂ કરવા માંગે છે, તે આગામી સમયમાં સ્પષ્ટ થશે.