દુબઈ:  મધ્ય પૂર્વના રણમેદાનમાં રમાઈ રહેલી રમત હવે ખતરનાક વળાંક પર પહોંચી ગઈ છે. 'વોલ સ્ટ્રીટ જર્નલ'ના એક ચોંકાવનારા અહેવાલ મુજબ, ઈરાને ખાડીના છ મહત્વના દેશો—સાઉદી અરેબિયા, કતાર, યુએઈ, જોર્ડન, કુવૈત અને બહેરીન—માં સ્થિત અમેરિકી રડાર અને મિસાઈલ ડિટેક્શન સિસ્ટમને નિશાન બનાવીને તેમને ક્ષતિગ્રસ્ત કરી દીધી છે. આ હુમલા પાછળની વ્યૂહરચના અમેરિકાને 'વ્યૂહાત્મક રીતે અંધ' કરવાની છે, જેથી ઈરાન દ્વારા છોડવામાં આવતી મિસાઈલો કે ડ્રોન અમેરિકી સેનાના ધ્યાને આવ્યા વિના જ ત્રાટકી શકે. આ હુમલાએ અમેરિકાના એ સુરક્ષા કવચમાં ગાબડું પાડ્યું છે જેનો ગર્વ પેન્ટાગોન દાયકાઓથી કરતું આવ્યું છે.

આ લશ્કરી કાર્યવાહી માત્ર રડાર તોડવા પૂરતી સીમિત નથી, પરંતુ તે વ્હાઇટ હાઉસ માટે પણ ચિંતાનો વિષય બની છે. ઈરાનના સુરક્ષા વડા અલી લારીજાનીએ સીધી ધમકી આપી છે કે ડોનાલ્ડ ટ્રમ્પે ઈઝરાયેલ-અમેરિકાના હુમલાની કિંમત ચૂકવવી પડશે. જોકે, ટ્રમ્પે હંમેશની જેમ આક્રમક શૈલીમાં આ ધમકીઓને ફગાવી દેતા જણાવ્યું છે કે તેઓ લારીજાનીના શબ્દોને ગંભીરતાથી લેતા નથી અને તેમને 'હારેલા' માને છે. તેમ છતાં, સુરક્ષા એજન્સીઓ માને છે કે જો ખાડી દેશોમાં પ્રારંભિક ચેતવણી આપતી સિસ્ટમ્સ નિષ્ક્રિય થઈ જાય, તો ટ્રમ્પના આગામી કાર્યકાળ માટે આ સૌથી મોટો સુરક્ષા પડકાર સાબિત થઈ શકે છે.

ઈરાને સાબિત કરી દીધું છે કે તેનો પ્રભાવ માત્ર ઈઝરાયેલની સરહદો સુધી સીમિત નથી, પરંતુ તે આખા ગલ્ફ રિજનને યુદ્ધની આગમાં લપેટી લેવાની ક્ષમતા ધરાવે છે. આ સર્જિકલ સ્ટ્રાઈક જેવા હુમલાઓએ તે તમામ દેશોને પણ ચેતવણી આપી છે જેઓ પોતાની ધરતી પર અમેરિકી સૈન્ય મથકોને આશરો આપી રહ્યા છે. અત્યારે સ્થિતિ એવી છે કે ઈરાની મિસાઈલો હવે રડારમાં દેખાશે નહીં, જે મધ્ય પૂર્વમાં રક્ષણાત્મક માનસિકતા ધરાવતા દેશો માટે અત્યંત જોખમી પાસું છે. આગામી દિવસોમાં અમેરિકા આ 'બ્લાઈન્ડ સ્પોટ'ને સુધારવા કેવો વળતો પ્રહાર કરે છે તેના પર સમગ્ર વિશ્વની નજર ટકેલી છે.