જમ્મુ: જઈરાનમાં ચાલી રહેલા યુદ્ધ જેવા તંગ માહોલ વચ્ચે ઉચ્ચ શિક્ષણ મેળવી રહેલા સેંકડો ભારતીય અને ખાસ કરીને કાશ્મીરી વિદ્યાર્થીઓની સુરક્ષા અંગે તેમના પરિવારોની ચિંતા વધી ગઈ છે. વાલીઓ અને ફસાયેલા વિદ્યાર્થીઓએ ભારત સરકાર અને વિદેશ મંત્રાલય પાસે આર્મેનિયા બોર્ડર મારફતે તાત્કાલિક સુરક્ષિત સ્થળાંતર (ઇવેક્યુએશન) કરવાની અપીલ કરી છે.

ડિજિટલ મીડિયા અને સત્તાવાર અહેવાલો મુજબ, ઈરાનના અલગ-અલગ શહેરોમાં સુરક્ષા વ્યવસ્થા સતત કથળી રહી છે.

ચિંતિત વાલીઓના એક પ્રતિનિધિમંડળે કાશ્મીરના ડિવિઝનલ કમિશનર સાથે મુલાકાત કરી હતી. કમિશનરે ખાતરી આપી છે કે પ્રશાસન અને સંબંધિત અધિકારીઓ સ્થિતિ પર ચાંપતી નજર રાખી રહ્યા છે.

જોકે, વર્તમાન સંજોગોને જોતા સ્થળાંતરની પ્રક્રિયામાં થોડો સમય લાગી શકે છે.

બીજી તરફ, ઈરાનમાં ફસાયેલા વિદ્યાર્થીઓએ જણાવ્યું છે કે તેઓ સતત ડરના છાયામાં જીવી રહ્યા છે. શિરાઝ શહેરમાં મેડિકલનો અભ્યાસ કરતા વિદ્યાર્થીઓએ તેમની હોસ્પિટલ અને પાસપોર્ટ ઓફિસ નજીક ધડાકા સાંભળ્યા હોવાનું જણાવ્યું હતું, જેના કારણે તેમને અંડરગ્રાઉન્ડ શેલ્ટરમાં આશરો લેવો પડ્યો હતો. 

તેહરાન યુનિવર્સિટી ઓફ મેડિકલ સાયન્સના વિદ્યાર્થીઓના જણાવ્યા અનુસાર, ધડાકાના અહેવાલો બાદ કોમ શહેરને 'રેડ એલર્ટ' પર રાખવામાં આવ્યું છે. અન્ય દેશો (જેમ કે અઝરબૈજાન) પોતાના નાગરિકોને બહાર કાઢી રહ્યા છે, ત્યારે વાલીઓની માંગ છે કે ભારતીય દૂતાવાસ (ઇન્ડિયન એમ્બેસી) દ્વારા સીધી અને સુવ્યવસ્થિત ઇવેક્યુએશન પ્રક્રિયા વહેલી તકે હાથ ધરવામાં આવે. *