જમ્મુ. કાશ્મીર ખીણમાં પાણીની અછત હવે ગંભીર સ્વરૂપ ધારણ કરી રહી છે. જીવનરેખા સમાન મનાતી ઝેલમ નદીના જળસ્તરમાં ભારે ઘટાડો નોંધાયો છે, જેના કારણે આગામી ઉનાળુ ડાંગર (ચોખા) ના પાકની મોસમ અંગે ખેડૂતો અને અધિકારીઓની ચિંતામાં વધારો થયો છે.

હાઈડ્રોલોજિકલ વિભાગના સત્તાવાર ડેટા અનુસાર, દક્ષિણ કાશ્મીરના સંગમ ખાતે ઝેલમ નદીમાં પાણીનું સ્તર ઘટીને માઇનસ ૦.૮૬ ફૂટ નોંધાયું છે. અધિકારીઓના જણાવ્યા મુજબ માર્ચ મહિનાની શરૂઆતમાં જળસ્તરનો આટલો મોટો ઘટાડો અત્યંત ચિંતાજનક છે. 

કૃષિ અને હવામાન નિષ્ણાતોના મતે, શિયાળાના મહિનાઓમાં સામાન્ય કરતાં ઘણી ઓછી હિમવર્ષા અને વરસાદ નહિવત થવાને કારણે નદીઓમાં પાણીનો પ્રવાહ ઘટી ગયો છે. ડાંગરની ખેતી માટે સિંચાઈની નહેરો સંપૂર્ણપણે ઝેલમ નદી પર નિર્ભર હોવાથી ખેડૂતો મુશ્કેલીમાં મુકાયા છે.

દરમિયાન, હવામાન વિભાગે ૧૨ માર્ચ સુધી જમ્મુ અને કાશ્મીરના મેદાની વિસ્તારોમાં હળવો વરસાદ અને ઊંચાણવાળા વિસ્તારોમાં હળવી હિમવર્ષાની આગાહી કરી છે. આ વરસાદથી દિવસના તાપમાનમાં ૩ થી ૫ ડિગ્રી સેલ્સિયસનો ઘટાડો થઈ શકે છે. 

જોકે, પ્રવર્તમાન શુષ્ક સ્થિતિને જોતા સ્થાનિક કાશ્મીરીઓ હવામાન વિભાગની આ આગાહી પર બહુ વિશ્વાસ કરી રહ્યા નથી. કૃષિ નિષ્ણાતો ચેતવણી આપી રહ્યા છે કે જો આગામી સપ્તાહોમાં વરસાદની સ્થિતિમાં નોંધપાત્ર સુધારો નહીં થાય, તો લાંબા ગાળાના દુષ્કાળ જેવી સ્થિતિ સિંચાઈ આયોજનને ખોરવી શકે છે.