મુંબઈ: ભારતીય ક્રિકેટના આક્રમક ઓપનિંગ બેટર પૃથ્વી શૉએ પોતાની જિંદગીની નવી અને સૌથી મહત્વની ઈનિંગ્સની શરૂઆત કરી દીધી છે. લાંબા સમયની અટકળો અને ડેટિંગ બાદ, પૃથ્વીએ તેની ગર્લફ્રેન્ડ અને જાણીતી સોશિયલ મીડિયા ઇન્ફ્લુએન્સર આકૃતિ અગ્રવાલ સાથે સગાઈ કરી લીધી છે. આજે 8 માર્ચના રોજ આંતરરાષ્ટ્રીય મહિલા દિવસે જ પૃથ્વીએ આ ખાસ જાહેરાત કરીને ચાહકોને સરપ્રાઈઝ આપી છે.
સોશિયલ મીડિયા પર શેર કરી દિલ જીતી લે તેવી પોસ્ટ
પૃથ્વી શૉએ ઇન્સ્ટાગ્રામ પર સગાઈની સુંદર તસવીરો શેર કરતા ખૂબ જ રોમેન્ટિક કેપ્શન લખ્યું છે. તેણે લખ્યું કે, "મેદાનમાં સિક્સર્સ ફટકારવાથી માંડીને જિંદગીભર હિટ થવા સુધીની સફર... આ મારી પરફેક્ટ ઈનિંગ્સ છે!" તસવીરોમાં પૃથ્વી ઘૂંટણિયે બેસીને આકૃતિને વીંટી પહેરાવતો જોવા મળી રહ્યો છે, જેને જોઈને ક્રિકેટ જગતના દિગ્ગજો અને ફેન્સ તેને અભિનંદન આપી રહ્યા છે.
કોણ છે આકૃતિ અગ્રવાલ?
પૃથ્વીની ભાવિ પત્ની આકૃતિ અગ્રવાલ સોશિયલ મીડિયાની દુનિયાનું જાણીતું નામ છે. તે એક ફેશન ઇન્ફ્લુએન્સર અને કન્ટેન્ટ ક્રિએટર છે. ઇન્સ્ટાગ્રામ રીલ્સ અને મ્યુઝિક વીડિયો દ્વારા તેણે પોતાની અલગ ઓળખ બનાવી છે. હાલમાં જ જ્યારે અર્જુન તેંડુલકરના લગ્ન પ્રસંગે પૃથ્વી તેની સાથે જોવા મળ્યો હતો, ત્યારથી જ સોશિયલ મીડિયા પર આ 'મિસ્ટ્રી ગર્લ' વિશે ચર્ચાઓ શરૂ થઈ હતી, જેનો હવે અંત આવ્યો છે.
કરિયરમાં ઉતાર-ચઢાવ વચ્ચે ખુશીની લહેર
પૃથ્વી શૉ માટે આ ખુશીના સમાચાર એવા સમયે આવ્યા છે જ્યારે તેનું ક્રિકેટ કરિયર થોડા સંઘર્ષમાંથી પસાર થઈ રહ્યું છે. 2021થી ભારતીય ટીમની બહાર રહેલા પૃથ્વીને IPL 2026 માં દિલ્હી કેપિટલ્સે તેની ₹75 લાખની બેઝ પ્રાઈઝ પર પોતાની ટીમમાં સામેલ કર્યો છે. ફેન્સ આશા રાખી રહ્યા છે કે જિંદગીની આ નવી ભાગીદારી પૃથ્વી માટે લેડી લક સાબિત થશે અને તે ફરી એકવાર મેદાન પર રનનો પહાડ ખડકશે.