તેહરાન: પશ્ચિમ એશિયામાં યુદ્ધની સ્થિતિ હવે અત્યંત ગંભીર વળાંક પર પહોંચી ગઈ છે. અમેરિકા અને ઈઝરાયેલ દ્વારા ઈરાન પર કરવામાં આવેલા હુમલાના જવાબમાં તેહરાને સમગ્ર ગલ્ફ વિસ્તારને નિશાન બનાવતા મિસાઈલ અને ડ્રોન યુદ્ધ છેડ્યું છે. સંઘર્ષના નવમા દિવસે પરિસ્થિતિ એટલી વણસી છે કે UAE, સાઉદી અરેબિયા, કતાર, કુવૈત અને બહેરીન જેવા શાંતિપ્રિય દેશોએ પોતાની સાર્વભૌમત્વ બચાવવા માટે સતત આકાશી હુમલાઓનો સામનો કરવો પડી રહ્યો છે.
UAE અને ગલ્ફ દેશો પર આકાશી જોખમ
સંયુક્ત આરબ અમીરાત (UAE) પર થયેલા મિસાઈલ હુમલાઓને એર ડિફેન્સ સિસ્ટમે સફળતાપૂર્વક અટકાવ્યા હતા, પરંતુ દુર્ભાગ્યવશ તેનો કાટમાળ વાહન સાથે અથડાતા દુબઈમાં એક પાકિસ્તાની ડ્રાઈવરનું મોત થયું છે. UAEના રાજદ્વારી સલાહકાર ડૉ. અનવર ગર્ગાશે સ્પષ્ટ કર્યું છે કે દેશ અત્યારે 'સ્વ-બચાવ'ની સ્થિતિમાં છે. માત્ર UAE જ નહીં, કુવૈતના એરપોર્ટ પર ઈંધણની ટાંકીઓ અને બહેરીનના ડિસેલિનેશન (પાણી શુદ્ધિકરણ) પ્લાન્ટ પર પણ ઈરાની ડ્રોને નિશાન સાધ્યું છે, જેના કારણે પ્રાદેશિક સુરક્ષા જોખમમાં મૂકાઈ છે.
ઈરાનનું મનોબળ: '6 મહિના સુધી લડી શકીએ છીએ'
બીજી તરફ, ઈરાનના રિવોલ્યુશનરી ગાર્ડ્સે (IRGC) આત્મવિશ્વાસ સાથે જાહેર કર્યું છે કે તેઓ અમેરિકા અને ઈઝરાયેલ સામે સતત છ મહિના સુધી તીવ્ર યુદ્ધ લડવાની ક્ષમતા ધરાવે છે. ઈરાની મીડિયા મુજબ, તેહરાને અત્યાર સુધીમાં 200થી વધુ અમેરિકન અને ઈઝરાયેલી ઠેકાણાઓ પર હુમલા કર્યા છે. જોકે, ઈઝરાયેલના વળતા હુમલામાં ઈરાનના ફાઈટર જેટ્સ અને તેલ ડેપોને મોટું નુકસાન થયું છે, જેના કારણે રાજધાની તેહરાનમાં ઈંધણ વિતરણ કામચલાઉ રીતે બંધ કરવાની ફરજ પડી છે.
ભારતીયોની સુરક્ષિત વાપસી અને એરપોર્ટની સ્થિતિ
આ ભયાનક યુદ્ધ વચ્ચે ભારત સરકાર પોતાના નાગરિકોની સુરક્ષા માટે એક્શન મોડમાં છે. છેલ્લા એક અઠવાડિયામાં 52,000 થી વધુ ભારતીયો ગલ્ફ દેશોમાંથી સુરક્ષિત રીતે પરત ફર્યા છે. દુબઈ એરપોર્ટ (DXB) પર કામગીરી આંશિક રીતે શરૂ થઈ છે, પરંતુ ઓમાન એર જેવી એરલાઈન્સે સુરક્ષાના કારણોસર અનેક ફ્લાઈટ્સ રદ કરી છે. અબુ ધાબીમાં ભારતીય દૂતાવાસે નાગરિકોને કડક સૂચના આપી છે કે કોઈ પણ સ્થળે મિસાઈલ કાટમાળ કે ઘટના સ્થળના વીડિયો ઉતારવા નહીં, અન્યથા કાયદેસરની કાર્યવાહી થઈ શકે છે.
નવા નેતાની પસંદગી અને ભાવિ રણનીતિ
યુદ્ધના આ મહાલોહિયાળ ખેલ વચ્ચે ઈરાનમાંથી મોટા સમાચાર મળી રહ્યા છે કે નવા સર્વોચ્ચ નેતાની પસંદગી પ્રક્રિયા લગભગ પૂર્ણ થઈ ગઈ છે. ઈઝરાયેલે સીધી ચેતવણી આપી છે કે તેઓ નવા પસંદ થનારા નેતાને પણ નિશાન બનાવતા અચકાશે નહીં. આરબ લીગે ઈરાનના આ હુમલાઓને 'અવિચારી' ગણાવીને તેને વ્યૂહાત્મક ભૂલ ગણાવી છે. હાલમાં આખું મધ્ય પૂર્વ બારૂદના ઢગલા પર બેઠું છે અને આગામી કલાકો આ પ્રદેશના ભવિષ્ય માટે નિર્ણાયક સાબિત થશે.