અમદાવાદ: વિશ્વના સૌથી મોટા ક્રિકેટ ગ્રાઉન્ડ નરેન્દ્ર મોદી સ્ટેડિયમમાં આજે માત્ર ચોગ્ગા-છગ્ગાની જ રમઝટ નથી બોલી, પરંતુ સંગીતની દુનિયાના દિગ્ગજોએ પણ સ્ટેજ પર જબરો તરખાટ મચાવ્યો છે. ICC T20 વર્લ્ડ કપ 2026 ના સમાપન સમારોહમાં ગ્લોબલ પોપ આઇકોન રિકી માર્ટિને પોતાના હિટ ગીતોથી એક લાખથી વધુ પ્રેક્ષકોના દિલ જીતી લીધા હતા. ભારત અને ન્યુઝીલેન્ડ વચ્ચેના હાઈ-વોલ્ટેજ મુકાબલા પહેલા આ કલાકારોએ માહોલને અત્યંત ગરમાવી દીધો હતો.
રિકી માર્ટિનનો લેટિનો જાદુ અને 'ધ કપ ઓફ લાઈફ'
બે વખતના ગ્રેમી વિજેતા અને વિશ્વભરમાં જાણીતા રિકી માર્ટિને જ્યારે સ્ટેજ પર એન્ટ્રી કરી ત્યારે આખું સ્ટેડિયમ તેના નામથી ગુંજી ઉઠ્યું હતું. તેણે 'લિવિન લા વિડા લોકા' (Livin' La Vida Loca) અને તેના આઇકોનિક ગીત 'ધ કપ ઓફ લાઈફ' પર શાનદાર પરફોર્મન્સ આપીને સાબિત કરી દીધું કે તેને શા માટે 'કિંગ ઓફ લેટિન પોપ' કહેવામાં આવે છે. તેના પ્રદર્શનના અંતે 'મારિયા' અને 'લા કોપા દે લા વિડા' પર પ્રેક્ષકો મનમૂકીને નાચ્યા હતા.
સુખબીરના ભાંગડા અને ફાલ્ગુનીની ગુજરાતી છાંટ
સમારોહમાં દેશી તડકો ઉમેરવા માટે 'પ્રિન્સ ઓફ ભાંગડા' સુખબીર સિંહ અને 'દાંડિયા ક્વીન' ફાલ્ગુની પાઠક પણ જોડાયા હતા. સુખબીરે તેના એવરગ્રીન હિટ ગીત 'ઓહ હો હો હો' થી પંજાબી મિજાજ રજૂ કર્યો હતો, તો બીજી તરફ ફાલ્ગુની પાઠકે 50 થી વધુ નર્તકો સાથે મળીને ગુજરાતી લોકગીતો અને બોલિવૂડ ગીતોની રમઝટ બોલાવી હતી. આંતરરાષ્ટ્રીય અને દેશી સંગીતના આ મિશ્રણે અમદાવાદની સાંજને યાદગાર બનાવી દીધી હતી.
વિશ્વ વિજેતા બનવા માટેનો મહાસંગ્રામ
આ સંગીતમય ભવ્યતા બાદ હવે મેદાન પર અસલી જંગ શરૂ થયો છે. એક તરફ ડિફેન્ડિંગ ચેમ્પિયન ભારત ફરી એકવાર ટ્રોફી જીતવા માટે મેદાને ઉતર્યું છે, તો બીજી તરફ ન્યુઝીલેન્ડ પોતાનું પ્રથમ વર્લ્ડ ટાઈટલ જીતવા માટે એડીચોટીનું જોર લગાવી રહ્યું છે. 7 ફેબ્રુઆરીએ શરૂ થયેલી આ ટુર્નામેન્ટનું આજે અમદાવાદમાં ભવ્ય સમાપન થઈ રહ્યું છે, જ્યાં લાખો લોકોની નજર હવે ટીમ ઈન્ડિયાના પ્રદર્શન પર ટકેલી છે.