જયપુર: બિહારના મધુબનીની દીકરી અને હાલમાં દરભંગાના અલીનગરથી ભાજપના ધારાસભ્ય એવી મૈથિલી ઠાકુર જ્યારે જયપુરના ઐતિહાસિક અને ભવ્ય ગોવિંદદેવજી મંદિરે દર્શન કરવા પહોંચી, ત્યારે ત્યાંનું વાતાવરણ જોઈને તે પોતાની લાગણીઓ પર કાબૂ રાખી શકી નહીં. મંદિરમાં ગુંજતા ભક્તિમય સૂર અને ભક્તોની અતૂટ શ્રદ્ધા જોઈને મૈથિલીની આંખોમાંથી અશ્રુધારા વહી નીકળી હતી.
ભક્તિના સૂર અને છલકાયેલી આંખો
મૈથિલી ઠાકુર પોતાના ભાઈઓ ઋષભ અને આયાચી સાથે મંદિર પરિસરમાં હતી, ત્યારે ત્યાં "આજ તો નવલી રાધા ગોરલ પૂજાન આયી ચાઈ..." સ્તોત્ર ગુંજી રહ્યું હતું. ભજનના મધુર સૂર, મંદિરમાં વાગતા ઘંટ અને ભક્તોની તાળીઓના ગડગડાટ વચ્ચે સર્જાયેલા આધ્યાત્મિક વાતાવરણે મૈથિલીને અંદર સુધી હચમચાવી દીધી. ભક્તિમાં લીન મૈથિલી રડતી હોય તેવો વીડિયો અત્યારે સોશિયલ મીડિયા પર જોરદાર વાયરલ થઈ રહ્યો છે.
ફેસબુક પર ઠાલવી મનની વાત
આ અવિસ્મરણીય અનુભવ બાદ મૈથિલીએ સોશિયલ મીડિયા પર એક પોસ્ટ શેર કરતા લખ્યું કે, "મેં અગાઉ ક્યારેય આવું અનુભવ્યું નથી. ગોવિંદદેવજીના દરબારમાં મને એવું લાગ્યું કે જાણે મારા મનનો બધો જ ભાર ઉતરી ગયો છે. ભક્તોની ભક્તિ જોઈને હું મારી જાતને કાબૂમાં ન રાખી શકી અને મારી આંખો વહી પડી." હજારો ચાહકોએ તેની આ પોસ્ટને સાચી ભક્તિ ગણાવીને બિરદાવી છે.
ગાયકીથી ધારાસભ્ય સુધીની સફર
બિહારના નાનકડા ગામમાંથી નીકળીને મૈથિલી ઠાકુરે પોતાની ગાયકીથી દેશ-વિદેશમાં નામ કમાવ્યું છે. ગત વર્ષે ભાજપની ટિકિટ પર ચૂંટણી લડીને તે ધારાસભ્ય બની હતી. આમ, તે સંગીત અને સેવાની નવી પેઢીનું પ્રતિનિધિત્વ કરી રહી છે. હાલમાં તે જયપુરમાં "રંગ રાજસ્થાન રંગ રથયાત્રા" કાર્યક્રમમાં ભાગ લેવા આવી છે, જેનો ઉદ્દેશ્ય લોક સંસ્કૃતિને પ્રોત્સાહન આપવાનો છે.
મુખ્યમંત્રી ભજનલાલ શર્મા સાથે મુલાકાત
જયપુર પ્રવાસ દરમિયાન મૈથિલીએ રાજસ્થાનના મુખ્યમંત્રી ભજનલાલ શર્મા સાથે પણ મુલાકાત કરી હતી. મુખ્યમંત્રીએ મૈથિલીની પ્રશંસા કરતા જણાવ્યું કે, "ભારતીય સંસ્કૃતિને વૈશ્વિક મંચ પર નવી ઓળખ આપનાર મૈથિલી ઠાકુર સાથે રાજસ્થાનના સાંસ્કૃતિક વારસા અંગે અર્થપૂર્ણ ચર્ચા થઈ."