નવી દિલ્હી: પશ્ચિમ એશિયામાં સતત વણસી રહેલી પરિસ્થિતિ અને લશ્કરી ગતિવિધિઓને જોતા ભારત સરકારે ઈરાનમાં રહેતા ભારતીય નાગરિકો માટે નવી સુરક્ષા સલાહ (Advisory) જારી કરી છે. પશ્ચિમ એશિયામાં વધી રહેલા તણાવને કારણે ભારતીયોની સુરક્ષા સુનિશ્ચિત કરવી એ સરકારની પ્રાથમિકતા બની છે.
સરહદી વિસ્તારોથી દૂર રહેવા સૂચના
ભારતીય દૂતાવાસે ઈરાનમાં રહેતા ભારતીયોને ખાસ વિનંતી કરી છે કે તેઓ અત્યારે દેશના સંવેદનશીલ અને સરહદી વિસ્તારોમાં મુસાફરી કરવાનું ટાળે. યુદ્ધ જેવી સ્થિતિમાં સરહદી વિસ્તારો સૌથી વધુ જોખમી સાબિત થઈ શકે છે, તેથી ત્યાં જવું જોખમથી ખાલી નથી.
દૂતાવાસની મહત્વપૂર્ણ ગાઈડલાઈન્સ:
૧. બિનજરૂરી મુસાફરી ટાળો: ભારતીય નાગરિકોને હાલ પૂરતી બિનજરૂરી મુસાફરી ટાળવા અને સુરક્ષિત સ્થળોએ રહેવા માટે કહેવામાં આવ્યું છે.
૨. સ્થાનિક તંત્રના સંપર્કમાં રહો: ઈરાનના સ્થાનિક સત્તાવાળાઓ દ્વારા જારી કરાયેલી સુરક્ષા સૂચનાઓનું ચુસ્તપણે પાલન કરવું અનિવાર્ય છે.
૩. સત્તાવાર માહિતી પર વિશ્વાસ: સોશિયલ મીડિયા પર ફેલાતી અફવાઓથી બચવા અને માત્ર દૂતાવાસ કે ભારત સરકારની સત્તાવાર માહિતી પર જ આધાર રાખવાની સલાહ અપાઈ છે.
૪. કટોકટીમાં સંપર્ક: કોઈપણ આકસ્મિક પરિસ્થિતિ અથવા મુશ્કેલીના સમયે ઈરાન સ્થિત ભારતીય દૂતાવાસનો તાત્કાલિક સંપર્ક કરવા જણાવાયું છે.
UAE બાદ હવે ઈરાનમાં પણ એલર્ટ
નોંધનીય છે કે થોડા દિવસો પહેલા જ સંયુક્ત આરબ અમીરાત (UAE) માં રહેતા ભારતીયો માટે પણ આવી જ સલાહ જારી કરવામાં આવી હતી. સમગ્ર ક્ષેત્રમાં વધતી જતી મિસાઈલ હુમલાની ધમકીઓ અને લશ્કરી જમાવટને કારણે ભારત સરકાર પોતાના નાગરિકોને લઈને કોઈ પણ જોખમ લેવા માંગતી નથી. ભીડભાડવાળા વિસ્તારો અને સંવેદનશીલ સ્થળોથી દૂર રહેવા માટે ભારતીય સમુદાયને અપીલ કરવામાં આવી છે.
ઈરાન અને ઈઝરાયેલ વચ્ચે વધતા જતા ગજગ્રાહની અસર હવે ગ્રાઉન્ડ લેવલ પર દેખાવા લાગી છે, જેના કારણે લાખો ભારતીય કામદારો અને વિદ્યાર્થીઓના પરિવારજનો ભારતમાં ચિંતાતુર છે.