નવી દિલ્હી: પશ્ચિમ બંગાળમાં મતદાર યાદીમાંથી મોટા પાયે નામ કાઢી નાખવાની ચાલી રહેલી પ્રક્રિયા સામે દાખલ થયેલી અરજી પર સુપ્રીમ કોર્ટ મંગળવારે સુનાવણી કરવા સંમત થઈ છે. મુખ્ય ન્યાયાધીશ સૂર્યકાંત અને ન્યાયાધીશ જોયમલ્યા બાગચીની બેન્ચે આ મામલાની ગંભીરતાને ધ્યાનમાં લેતા તેને સુનાવણી માટે લિસ્ટ કર્યો છે.
મતદારોની વ્યથા અને વકીલની દલીલ
અરજદારો વતી વરિષ્ઠ વકીલ મેનકા ગુરુસ્વામીએ કોર્ટને જણાવ્યું કે, આ એવા મતદારો છે જેમણે અગાઉની ચૂંટણીઓમાં મતદાન કર્યું છે. પરંતુ અત્યારે ચાલી રહેલી SIR પ્રક્રિયામાં તેમના નામ કાઢી નાખવામાં આવ્યા છે અને તેમના દસ્તાવેજો સ્વીકારવામાં આવતા નથી. આનાથી લોકશાહીના મૂળભૂત અધિકાર પર તરાપ વાગી રહી હોવાની રજૂઆત કરવામાં આવી હતી.
૮૦ લાખ વાંધાઓ અને જજોની અછત
પશ્ચિમ બંગાળમાં મતદાર યાદીમાં 'તાર્કિક વિસંગતતા' (Logical Errors) ને કારણે લાખો નામ પર તલવાર લટકી રહી છે.
•    વિસંગતતાના પ્રકાર: માતા-પિતાના નામમાં મેળ ન પડવો, અથવા મતદાર અને તેના માતા-પિતા વચ્ચેની ઉંમરનો તફાવત ૧૫ વર્ષથી ઓછો કે ૫૦ વર્ષથી વધુ હોવો.
•    ન્યાયિક પડકાર: અગાઉ સુપ્રીમ કોર્ટે ૨૫૦ જિલ્લા ન્યાયાધીશો ઉપરાંત ઓડિશા અને ઝારખંડના ન્યાયિક અધિકારીઓને પણ આ કામગીરીમાં જોડવાની મંજૂરી આપી હતી.
•    સમયમર્યાદાનો અભાવ: કોલકાતા હાઈકોર્ટના મુખ્ય ન્યાયાધીશના જણાવ્યા મુજબ, જો દરેક જજ દરરોજ ૨૫૦ કેસ ઉકેલે તો પણ આ પ્રક્રિયા પૂરી કરવામાં ૮૦ દિવસ જેટલો સમય લાગે તેમ છે.
ચૂંટણી પંચ અને કાયદાકીય સ્થિતિ
ચૂંટણી પંચે અગાઉ આક્ષેપ કર્યો હતો કે કેટલાક લોકો દ્વારા નોટિસ બાળવામાં આવી રહી છે, જેના પર સુપ્રીમ કોર્ટે રાજ્યના ડીજીપી પાસે જવાબ માંગ્યો હતો. સીજેઆઈએ સ્પષ્ટ કર્યું હતું કે તેઓ આ પ્રક્રિયામાં કોઈ પણ પ્રકારનો અવરોધ ચલાવી લેશે નહીં, પરંતુ જે લોકોના નામ ખોટી રીતે કટ થયા છે તેમને ન્યાય મળે તે પણ જરૂરી છે.
મંગળવારની સુનાવણી પર આખા પશ્ચિમ બંગાળ અને રાજકીય પક્ષોની નજર છે, કારણ કે આ નિર્ણય આગામી ચૂંટણીઓના સમીકરણો બદલી શકે છે.