કોલકાતા:  રાષ્ટ્રપતિ દ્રૌપદી મુર્મુની બંગાળ મુલાકાત દરમિયાન મુખ્યમંત્રી મમતા બેનર્જીની ગેરહાજરીએ રાજકીય ધરતીકંપ સર્જ્યો છે. કેન્દ્રીય ગૃહ મંત્રાલયને મોકલેલા રિપોર્ટમાં મુખ્ય સચિવ નંદિની ચક્રવર્તીએ સ્પષ્ટ કર્યું છે કે મમતા બેનર્જી જાણીજોઈને ગેરહાજર રહ્યા નહોતા, પરંતુ રાષ્ટ્રપતિ સચિવાલય દ્વારા મંજૂર કરાયેલી સત્તાવાર સ્વાગત યાદીમાં મુખ્યમંત્રીનું નામ જ સામેલ કરવામાં આવ્યું નહોતું. આ ઉપરાંત, આંતરરાષ્ટ્રીય આદિવાસી પરિષદના સ્થળમાં છેલ્લી મિનિટે થયેલા ફેરફાર પાછળ વહીવટી તર્ક હોવાનું જણાવી રાજ્ય સરકારે પ્રોટોકોલ ભંગના તમામ આરોપો ફગાવી દીધા છે.

આ વિવાદ ત્યારે વકર્યો જ્યારે ૭ માર્ચે રાષ્ટ્રપતિએ જાહેરમાં નારાજગી વ્યક્ત કરતા કહ્યું, "મમતાજી મારી નાની બહેન છે, ખબર નહીં કેમ ગુસ્સે છે." રાષ્ટ્રપતિના આ નિવેદન અને ત્યારબાદ વડાપ્રધાન નરેન્દ્ર મોદીએ રાજ્ય સરકાર પર કરેલા આકરા પ્રહારો બાદ કેન્દ્રએ 'બ્લુ બુક' (VIP સુરક્ષા નિયમો) ના ઉલ્લંઘન અંગે જવાબ માંગ્યો હતો. રાજ્ય સરકારે વળતો પ્રહાર કરતા જણાવ્યું છે કે જિલ્લા વહીવટીતંત્રે તમામ નિયમોનું પાલન કર્યું છે અને મુખ્યમંત્રીને કાર્યક્રમની સત્તાવાર માહિતી સમયસર આપવામાં આવી નહોતી.

ગૃહ મંત્રાલય હવે આ રિપોર્ટની તપાસ કરી રહ્યું છે, પરંતુ બંગાળ અને કેન્દ્ર વચ્ચેના સંબંધોમાં આ ઘટનાએ નવી કડવાશ ઉમેરી છે. ભાજપે તેને રાષ્ટ્રપતિ પદનું અપમાન ગણાવ્યું છે, જ્યારે ટીએમસીએ તેને કેન્દ્રની 'યોજનાબદ્ધ રાજનીતિ' ગણાવી છે. પશ્ચિમ બંગાળના સચિવાલય 'નબન્ના' એ દાવો કર્યો છે કે તમામ જરૂરી દસ્તાવેજો રજૂ કરવામાં આવ્યા છે જે સાબિત કરે છે કે વહીવટી સ્તરે કોઈ ચૂક થઈ નથી.