ટોક્યો, તા. 10: ઉગતા સૂર્યના દેશ તરીકે ઓળખાતા જાપાનમાં વસવાટ કરવાનું સપનું જોતા વિદેશી નાગરિકો માટે આંચકાજનક સમાચાર આવ્યા છે. જાપાન સરકાર વિદેશી રહેવાસીઓની વધતી સંખ્યા અને વહીવટી ખર્ચને પહોંચી વળવા માટે વિઝા અને રહેઠાણ સંબંધિત ફીની કાનૂની મર્યાદામાં ૧૦ ગણો વધારો કરવાનું આયોજન કરી રહી છે. જાપાનની કેબિનેટે ઇમિગ્રેશન કાયદામાં સુધારાના બિલને મંજૂરી આપી દીધી છે, જે ૧૯૮૨ પછીનો સૌથી મોટો ફેરફાર ગણાય છે.
કાયમી રહેઠાણની ફીમાં મસમોટો ઉછાળો
નવા પ્રસ્તાવ મુજબ, નિવાસસ્થાનની સ્થિતિ બદલવા અથવા રોકાણનો સમયગાળો લંબાવવા માટેની મહત્તમ ફી હાલના ¥10,000 (આશરે ₹5,500) થી વધારીને ¥100,000 (આશરે ₹55,000) કરવામાં આવશે. સૌથી મોટો ફટકો કાયમી રહેઠાણ (Permanent Residency) મેળવવા ઈચ્છતા લોકોને પડશે, કારણ કે તેની ફીની ટોચમર્યાદા ¥10,000 થી વધારીને સીધી ¥300,000 (આશરે ₹1.65 લાખ) કરવાની દરખાસ્ત છે. જોકે, ગંભીર આર્થિક મુશ્કેલી કે માનવતાવાદી કારણો ધરાવતા લોકોને આ ફીમાં મુક્તિ મળી શકે છે.
કેમ લેવાયો આ કડક નિર્ણય?
જાપાનમાં વિદેશી રહેવાસીઓની સંખ્યા ૨૦૨૫ના અંત સુધીમાં ૪.૧૩ મિલિયનના વિક્રમી સ્તરે પહોંચી ગઈ છે. ઇમિગ્રેશન સર્વિસીસ એજન્સીના જણાવ્યા અનુસાર, રહેઠાણની તપાસ, ડિજિટલાઇઝેશન અને ડેટા શેરિંગ પાછળ થતો ખર્ચ વર્તમાન ફી દ્વારા આવરી લેવો મુશ્કેલ બન્યો છે. ન્યાય પ્રધાન હિરોશી હિરાગુચીએ સ્પષ્ટ કર્યું કે, આ ફેરફારનો હેતુ એ સુનિશ્ચિત કરવાનો છે કે વિદેશી નાગરિકો પણ જાપાનની ઇમિગ્રેશન વ્યવસ્થાના સંચાલનમાં પોતાનો આર્થિક ફાળો આપે.
JESTA: મુસાફરી પહેલાં મંજૂરી લેવી પડશે
ફી વધારા ઉપરાંત, જાપાન સરકાર ૩૧ માર્ચ, ૨૦૨૯ સુધીમાં નવી ઇલેક્ટ્રોનિક ટ્રાવેલ ઓથોરાઇઝેશન સિસ્ટમ ‘JESTA’ લાગુ કરશે. આ સિસ્ટમ હેઠળ વિઝા-મુક્ત ટૂંકા ગાળાના મુલાકાતીઓએ પણ જાપાનની મુસાફરી કરતા પહેલા અગાઉથી મંજૂરી મેળવવી પડશે. એરલાઇન્સ કંપનીઓએ મુસાફરોની વિગતો પહેલેથી જ મોકલવાની રહેશે અને મંજૂરી નકારવામાં આવે તો તેમને મુસાફરી કરવા દેવામાં આવશે નહીં. ૨૦૨૫માં જાપાન આવેલા ૩૮ મિલિયન પ્રવાસીઓમાંથી ૮૦% વિઝા-મુક્ત પ્રવાસીઓ હતા, જેમના પર હવે આ નિયમ લાગુ થશે.