નવી દિલ્હી: મિડલ ઈસ્ટમાં ચાલી રહેલા ભીષણ સંઘર્ષની અસર ભારતના રસોડા સુધી ન પહોંચે તે માટે કેન્દ્ર સરકાર અને રાજ્ય સંચાલિત ઓઈલ માર્કેટિંગ કંપનીઓ (OMCs) એ કમર કસી છે. મંગળવારે ઇન્ડિયન ઓઇલ (IOCL), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL) એ સંયુક્ત જાહેરાત કરી છે કે તેઓ દેશમાં લિક્વિફાઇડ પેટ્રોલિયમ ગેસ (LPG) નું ઉત્પાદન વધારશે. કેન્દ્ર સરકારના કડક આદેશ બાદ હવે રિફાઇનરીઓ પ્રોપેન અને બ્યુટેન જેવા ઘટકોનો સંપૂર્ણ ઉપયોગ માત્ર LPG બનાવવા માટે જ કરશે, જેથી સ્થાનિક ગ્રાહકોને ગેસની અછતનો સામનો ન કરવો પડે.
હોર્મુઝ સ્ટ્રેટમાં અવરોધથી ભારત ચિંતામાં
ભારત પોતાની LPG જરૂરિયાતના અંદાજે 60 ટકા જેટલો હિસ્સો આયાત પર નિર્ભર છે અને આ આયાતનો 90 ટકા હિસ્સો પશ્ચિમ એશિયામાંથી આવે છે. ઈરાન અને ઈઝરાયલ વચ્ચેના યુદ્ધને કારણે ‘હોર્મુઝ સ્ટ્રેટ’ જેવા મહત્વના દરિયાઈ માર્ગો પર જોખમ વધ્યું છે. જો આ માર્ગ ખોરવાય તો ભારતમાં ગેસનો પુરવઠો અટકી શકે તેમ છે. આથી જ, સરકારે તમામ સ્થાનિક ઉત્પાદકોને આદેશ આપ્યો છે કે તેઓ તેમનું તમામ ઉત્પાદન માત્ર આ ત્રણ સરકારી કંપનીઓને જ સપ્લાય કરે, જે દેશના 99 ટકા ઘરેલુ વપરાશને પૂરો કરે છે.
બુકિંગના નિયમો કડક અને ભાવમાં વધારો
પુરવઠાની અછત અને સંગ્રહખોરીને રોકવા માટે કંપનીઓએ નવા ગેસ સિલિન્ડર બુક કરાવવાના નિયમમાં ફેરફાર કર્યો છે. હવે ગ્રાહકોએ છેલ્લા ડિલિવરી બાદ નવું બુકિંગ કરાવવા માટે 21 દિવસને બદલે 25 દિવસ સુધી રાહ જોવી પડશે. ઉલ્લેખનીય છે કે, ગયા અઠવાડિયે જ ઘરેલુ LPG સિલિન્ડરના ભાવમાં ₹60 અને કોમર્શિયલ સિલિન્ડરના ભાવમાં ₹114.50 નો તોતિંગ વધારો ઝીંકવામાં આવ્યો છે, જેણે સામાન્ય જનતાના બજેટ પર પહેલેથી જ બોજ વધાર્યો છે.
કડક કાર્યવાહીની ચેતવણી
કેન્દ્ર સરકારે સ્પષ્ટ કર્યું છે કે જો કોઈ કંપની કે રિફાઇનરી આદેશનું ઉલ્લંઘન કરશે અથવા ઉત્પાદન સપ્લાય કરવામાં આનાકાની કરશે, તો તેમની સામે આવશ્યક ચીજવસ્તુ અધિનિયમ, 1955 હેઠળ કડક કાનૂની કાર્યવાહી કરવામાં આવશે. ઓએમસીના એક્ઝિક્યુટિવ ડિરેક્ટરોની સમિતિ હવે બિન-સ્થાનિક ક્ષેત્રોની વિનંતીઓની સમીક્ષા કરશે અને માત્ર અત્યંત આવશ્યક સેવાઓને જ ગેસ પુરવઠો આપવાની પ્રાથમિકતા નક્કી કરશે.